AFP batok sa tintal

Niadtong niaging Domingo mao man ang Unang Domingo sa Kwaresma. Nakasentro niini ang nasinating tintal sa atong Ginoo sa wala pa niya masugdi ang iyang ministry. Bisan unsang mga haylo ang gihimo sa kaaway ang atong Ginoo nahimong mahugtanon sa iyang misyon ug matinud-anon sa Amahan. Iyang gihinginlan si Satanas ang kaaway nga mopatibulaag sa kadaghanan.

Adunay mga pipila ka mga butang nga atong hinumdoman kun maghisgot kita og tentasyon. Malangkob nato kini sa mga letra nga AFP dili ni ang Armed Forces of the Philippines. Kondili kini nagpasabot ning mosunod:

Awareness. Kun ang pagkaalinggat. Nindot nga mamahimo kitang aware sa atong kusog apan sa laing bahin kinahanglanon nga mamahimo kitang aware sa atong mga kahuyangan. Dili maayo nga mangarasti kita batok sa atong kaaway nga wala kita makaila sa atong kaugalingong kahuyangan ug kusog. Sukaranang prinsipyo kini sa dili pa nato ila ilahon ang atong mga kaaway.

Flight kun pagkagiw. Dili sa tanang panahon nga atong himoong atubangon ang atong kaaway uban ang kaisog. Usahay gikinahanglan ang pagtalaw ug pag-ikyas aron dili kita mabutang sa dakong kadaut.

Prayer and Perseverance. Dili tanang pakig-asdang mahimo s atong kaugalingong mga kusog ug gahom. Espirituhanon ang maong pakigbisog busa gikinahanglan ang hinabang espirituhanon. Mag-ampo kita alang sa Espirituhanong Panalipod apan sa laing bahin gikinahanglan nga mamahimo kitang makanunayon ug malahutayon gayud. Pag-ampo sa walay paghunong.