Taphaw nga Paghandum sa EDSA People Power
Aduna pa bay bili ang EDSA People Power? Sa tinuod lang, inanay nga gipatay ang mithi niini sa kasamtangang administrasyon. Klaro kaayo kini sa dihang wala na kini hatagi og bili duha ka tuig na ang nakalabay pinaagi sa wala na pagdeklarar niini isip usa ka holiday. Siyempre, kining bloodless revolution mao ang hinungdan nga napalagpot ang rehimeng Marcos human sa taas nila nga paghupot sa gahum—gipildi sila sa gahum sa katawhan. Samtang anaa pa sa gahum ang mga Marcos, ang EDSA People Power posibleng kutob na lang sa paghandum alang niadtong mga tawo nga nahimong kabahin sa maong makasaysayanong panghitabo. Posible usab nga padung na kini sa pagkapapas sa mga libro sa kasaysayan sa Pilipinas. Tungod kay kung hatagan nila kini og importansya, susama ra nga nagkuha sila og lapok nga isablig sa ilang kaugalingong nawong. Sa tinuod lang, daw napalong na ang kainit sa pagbati niadtong mga personalidad nga saba kaayo kaniadto ug hilabihang ka kritiko sa mga Marcos. Gani, duna pay nag-ingon kaniadto og "Never Again" kay dili na nila matulon nga laing miyembro sa pamilya ang modumala sa nasud. Apan kining mga tawhana mibahag na ang ikog ug niapil na sa "party" sa presidente; gitulon nila ang ilang gipangluwa kaniadto. Ingon niana gyud ang realidad: ang kausaban sa mga tawo nga andam motunob sa ilang prinsipyo alang sa personal nga katuyoan ug aron masiguro ang pagpabilin sa gahum. Personal interest ug political survival—pagkapait gayod. Gani, taliwala sa naghitak karon nga kurapsyon, ilabi na sa mga flood control projects, hilom pa sa tirana kining mga tawhana. Bisan ang mga opisyal sa Senado nga nailhan kaniatong "isog" motirada sa mga kahiwian, wala na mopaghot karon.
Angayan gyud unta nga dili ilubong sa kalimot kining dakong panghitabo nga dako og epekto dili lang sa Pilipinas kondili sa tibuok kalibutan. Ang bloodless revolution sa nasod nahimong sumbanan ug nakapukaw sa ubang kanasoran nga mahimo diayng pildehon ang abusadong kagamhanan bisan walay armas, basta magkahiusa lang ang katawhan.
Dunay mga grupo karon nga mainiton gihapon sa ilang kawsa nga nagtinguha nga mahibalik sa pedestal ang EDSA People Power. Apan mahulog lang kini sa wala kon walay suporta gikan sa mga magbabalaod nga mopalig-on unta niini isip usa ka permanenteng holiday—aron bisan kinsa pa nga presidente ang molingkod, dili na kini mausab.
Karong adlawa, basin kutob na lang sa seremonyas ang mga kalihokan sa nagkadaiyang grupo.
Ini’g ka human, wala na. Mahulog na lang ang komemorasyon sa EDSA nga usa ka ordinaryong adlaw diin makapadayag sa ilang yangungo ang mga tawo. Apan bahala og wala na kini hatagi og bili sa kagamhanan karon, alang niadtong mga tawo nga nagpabilin ang pagpangga sa mga leksyon sa kasaysayan, magpabilin kining nakakulit sa kasingkasing ug panumdoman.
- Latest















