Naguol gyud ko

Way trabaho sa mga opisina sa kagamhanan dinhi sa Cebu City karong adlawa kay ang siyudad magsaulog sa iyang ika-89 nga Charter Anniversary ug sa Miyerkules, wa gihapo’y trabaho kay anniversary sab sa Edsa People Power Bloodless Revolution.

Hayahay kaayo ang mga kawani sa kagamhanan kay way trabaho apan sige ang sweldo niadtong nadestino sa mga opisina. Mao nga bawion gyud unta ninyo nga kon motrabaho na mo, dili magniligoy.

* * *

Hisgotan nato kining pagbutang og Garbage Transfer Station diha sa Block 27 sa North Reclamation Area sa Cebu City. Anha diha hagpata ang mga basura aron pilion kadtong madugta ug dili malata.

Unsaon nga bisan og gipahibawo na sa kagamhanan sa Cebu City nga gili hakoton ang mga basura nga wa gilain-lain ang malata ug dili malata, wa man gihapon motuman ang katawhan.

Wa ko’y labot niana kay duna ko’y compost pit nga labayanan sa akong basura. Nahunahuna man gud nako nga mao ra gihapon ko ipahakot nako akong basura, kada semana magbayad og og P400 sa mohakot.

Ang Block 27, yuta kana nga gipanag-iya sa Cebu City government, apan anaa kini mahimutang sakop sa Barangay Mabolo. Nahimangod ang kapitan nga si Daniel Arguedo kay wa kuno mopahibawo niya ang siyudad.

Bitaw, bisan courtesy na lang unta ba, ang tinugyanan sa Department of Public Services (DPS) maoy mohimo niini sa nga’n sa mayor, or si Mayor Nestor Archival gyud mismo ang mopahibawo sa kapitan.

Apan tungod sa kadaghan sa mga giatiman nga gimbuhaton sa mayor, tan-aw nako ang hepe sa DPS unta maoy mopahibawo. Unya, dihang nagkabayloanay na og mga makapasilo nga pamahayag, wa na man sab tugoti ang garbage truck sa Mabolo nga moyabo og basura sa Block 27.

Tungod niini, misamot nga midako ang isyu. Nakapangutana ko kon kang kinsa man nga order nga ang mga garbage truck sa Mabolo dili tugotan nga moyabo og basura sa Block 27, ug ngano man?

Kini angay ni tukion pag-ayo. Husto si kanhi Konsehal Maryann Delos Santos nga dili maayong maglalis ta kabahin sa paghipos sa atong mga basura, ug hinoon, magtinabangay ta.

Natan-aw man gud nako nga pwerteng bisiha ni Mayor Archival uy, dili mahimutang sa pag-atiman sa mga miting, pakig-estorya sa mga dunay tuyo kaniya, ug dili na gyud maka-concentrate pag-ayo pagtutok sa isyu.

Unya, kanunay pa nga gilatigo sa mga pagsaway sa ubang kumentarista sa radyo, ug sa mga netizen. Nganong naingon man kini niini?

Tan-aw nako, dunay sulbad niini, ug mao ang pag-delegate sa ubang trabaho ngadto sa iyang mga tawo, dili kay hakpon sa mayor ang tanang trabaho.