Editoryal — Way moangkon

Sa nanglabay nga mga adlaw, dunay mga nahitabong naglambigit gihapon sa mga kabataan. Duna nila maoy nabiktima ug duna sab mga hitabo nga sila maoy namiktima ug nakamugna og kahasol ug kasamok sa uban.

Sayun kaayo ug dali kaayong pasanginlan o basulon sa uban ang gobiyerno ug ang balaod nga Republic Act 7610 Child Abuse Protection kay mao daw lagi kunoy hinungdan kun nganong daghang kabataan karon ang mga nalambigit sa krimen o grabe gyud ka badlungon.

Gani gipasangil sab ni nga maoy hinungdan kun nganong dunay mga menor de edad nga nalambigit sa pagpamaligya og ilegal nga drugas—kay lagi daw kung wala pay 17 anyos dili mapasakaan og kaso ug ibutang lang kustodiya sa social workers.

Sa laktod, gilantaw nila ang maong balaod nga dangan, maoy hinungdan kun nganong daghang mga kabataan karon ang nahimong mga kriminal, badlungon, ug walay direksyon ang kinabuhi

Pero sa pagkatinuod, kanang balaora nga gipangamahan ni Senador Francis “Kiko” Pangilinan , gidesinyo gyud para sa prorteksyon sa mga kabataan ug dili para sa proteksyon sa mga kriminal.

Walay nakasuwat sa mga probisyon sa RA 7610 nga protektahan sa maong balaod ang mga malapason sa balaod. Ang tanang probisyon pulos nagprotihir sa kinabuhi, kagawasan, edukasyon, panglawas, pagkatawo ug bisan panghunahuna sa mga kabataan.

Ang nakapait lang, kadtong mga namasangil nga kining maong balaora maoy hinungdan, wala magtan-aw sa ilang kaugalingon, wala pamalandungi ang ilang mga buhat ug kung unsay dakong kaayohan anang balaora para sa ilang mga anak.

Tinuod dili gyud matagna ang panahon o kung unsay mahitabo, apan dako kaayo og papel ang mga ginikanan aning bahina para sa proteksyon sa ilang mga anak.

Kung magpabaya ang mga ginikanan ug nabiktima ilang mga anak og krimen, dapat unta angkunon sab nila nga sila nagkulang, dapat sab nilang basulon ang tigpatuman sa balaod kay wala nila mamentinar ang kahapsay ug kalinaw ug proteksyon sa publiko ug labaw sa tanan mao ang katilingban.

Pero ang pangutana, kinsa man diay ni ang katilingban? Dili ba ang tanan man? Pero nganong ang balaod man hinuoy pasanginlan sa pagpabaya ug walay pagpakabana?