Arraignment ni Pajarillo
Ambot walay nakapahibawo sa mga sakop sa media sa arraignment ni Sean Andrew Pajarillo niadtong Biyernes. Bisan sa ka-kontrobersiyal sa kaso, walay nakahunahuna sa pakigsawo sa publiko nga gibasahan na si Pajarillo sa kasong reckless imprudence resulting in homicide tungod sa kamatayon ni Kingston Ralph Cheng.
Gabii na niadtong Biyernes ko nahibawo sa arraignment. Dihang ni-chat ang kanhi kaubang trabahante sa ABS-CBN Cebu. Gipasa niya ang pangutana sa mga higala ni Kingston nganong walay media nga ni-cover sa kalihokan. Gitubag nako siya nga tingali sama nako wala mahibawo ang reporters.
* * *
Masabot nga dili interesado sa media coverage ang mga Pajarillo. Peligro gani nga gamiton ang ilang impluwensiya aron tagoan gikan sa publiko ang umaabot nga mga husay sa kaso. Llisod himuon kay kinahanglan mang publiko ubos sa balaod. Gawas lang kon, sama niadtong Biyernes, dili pahibaw-on ang media.
Tingali hilumon lang gyod ang Pamilyang Cheng. Tingali natakdan ang ilang mga abogado. Ambot nganong walay taga korte ug taga Cebu City Prosecutor’s Office nga nakapindot sa media kay kasagaran ganahan og media (gawas lang kon gisabot sab sa mga Pajarillo).
* * *
Hinaot nga dunay makasulti sa Pamilyang Cheng ug sa ilang mga abogado nga dakong tabang sa kawsa para sa hustisya ni Kingston ug ubang mga biktima sa drunk driving ang suporta sa publiko. Nga nisimpatiya nila tungod sa kakalit ug kabangis sa kamatayon ug sa kahinugon sa masaaron nga kinabuhi sa 23 anyos pa nga negosyante.
Ug mapahinumdoman sila nga ang kamabinantayon sa publiko maoy kinakusgan nilang panagang sa posibleng mga maniobra sa husay (sama sa nahaunang pagbabag sa mga polis gikan sa Chong Hua Hospital Mandaue ug sa kapin sa 18 ka oras nga kalangay sa alcohol test).
* * *
Akong nahibaw-an nga duna na say laing husay sa kaso nga gitakda nga himuon karong adlawa, Lunes, Pebrero 23. Hinaot nga duna nay mga sakop sa media nga maka-cover aron makasubay ang mas daghang Sugbuanon.
Dunay nakasulti nako nga ang kaso ni Pajarillo nadestino sa Cebu City Regional Trial Court (RTC) Branch 17 nga ubos sa pagdumala ni Presiding Judge Anacleto Debalucos. Si Judge Debalucos mao sab ang Executive Judge sa Cebu City RTC.
* * *
- Latest
