EDITORYAL — Malinawong rebolusyon

Karong Pebrero 25 saulogon sa Pilipinas ang ika-40 nga kasumaran sa EDSA People Power Revolution.

Ang maong bahin sa kasaysayan sa nasud dili lang dinhi sa Pilipinas nagbilin og marka kondili sa uban pong mga nasud nga misuway sab og buhat niini aron palagputon ang ilang mga nangabusar nga mga naa sa gahum.

Ang EDSA Revolution, bisan tuod og dunay mga nisaway ug wala mohatag og importansiya ani nakapausab sa kinabuhi sa mga Pilipino tungod sa kagawasan gikan sa diktadoriya.

Dili armas, dili sa bayolente nga paagi napalagpot ang diktadoryang Marcos kondili pinaagi sa malinawon ug puno sa pag-ampo sa nagkahiusang mga Pilipino nga nahigmata na sa kamatuoran.

Pinaagi sa EDSA Revolution niadtong 1986, naputol ang Martial Law nga gideklarar ni anhing presidente Ferdinand Marcos Sr. , ang amahan sa kasamtangang presidente sa nasud karon nga si Ferdinand Marcos Jr.

Para sa mga kabataan, sa libro lang nila kini nabasahan o nahibaw-an kay kabahin sa ilang leksyon. Apan sa mga tawong nabiktima sa pagpangabusar anang panahona, nagbilin kadto og ulat sa ilang kasingkasing ug sa panumdoman.

Ang maong rebolusyon nga gitawag sab nga “bloodless revolution” maoy pinakauna sukad sa kasaysayan sa mga rebolusyon sa tibuok kalibotan—way namatay o wala nagkagiyera sibil , napapha ang diktadoryang Marcos kauban ang mga opisyales nga ilang kakunsabo sa pagmalmal sa nasud.

Ang selebrasyon karong tuiga angay kini nga handumon sa tanan, dili sagulan og politika ug dili himuong rason aron dudahan ang motibo sa pagsaulog niini.

Tungod kay gipakita dinhi nga kun magkahiusa ang tanang Pilipino pagkab-ot sa gitinguhang kagawasan, mabuhat kini sa malinawong paagi ug bisan kadtong pinakataas nga lider sa nasud manubag sa mga Pilipino.

Subo lang kaayo nga daghan sa mga Pilipino ang nakalimot sa kung unsa kadako ang nahimong papel sa maong rebolusyon sa kagawasang natagamtaman sa tanan karon.

Subo lang pud nga usahay kining maong kagawasan giabusaran sab sa uban ug wala nay tahod sa naa sa gobiyerno tungod sa politika gihapon.