Textmate ang 8888
Nangutana ko sa usa sa mga inahan nga nagpaabot sa pagpanggawas sa mga estudyante sa Consolacion Central Elementary School (CCES) kon sama sa ubang mga eskuylahang publiko naproblema ba sab sila sa daghang amotan nga gipangayo sa Parent-Teacher Associations (PTAs). Nakugang ko sa iyang tubag nga, “Wala.”
Kaingon nako nga sipsip o hadlok lang siya sa mga magtutudlo. Pero nipasalig nga wala silay amotan. Gani sa niaging Valentine’s Day ang maestra sa iyang anak maoy nigasto ug namalihug sa usa sa mga ginikanan pagluto og spaghetti para sa mga bata.
* * *
Ngano man? Mas nakugang ko sa iyang tubag, “Tungod sa 88.” Hadlok kuno ang prinsipal ug mga magtutudlo kay nakatultol nang mga ginikanan sa 8888, ang citizens’ complaint center sa Malakanyang. Kataposang maesta nga nisuway og pangolekta, nakadawat og memorandum gikan sa Department of Education (DepEd) kay gireklamohan sa Office of the President (OP).
Ang 8888, kon nakahinumdom pa ka, gisugdan sa administrasyon ni kanhi Presidente Rodrigo Duterte. Usa sa mga programang nakalahutay sa bangis nga linigwatay sa duha ka labing gamhanan nga politikanhon nga mga dinastiya sa nasud.
* * *
Pag-uli nako sa balay, gisuwayan nakong 8888. Gi-detalye ang labing bag-ong reklamo nga akong nadawat sa guarantee letter ni Mandaue City Mayor Jonkie Ouano nga nipasalig sa University of Cebu Medical Center (UCMed) og P150,000 sa utang sa usa ka pasyente pinaagi sa MAIFIP (Medical Assistance for Inndigent and Financially Incapacitated Patients).
Nakadawat ko og automated text nga kon makakita sila og sukaranan sa reklamo hatagan ko nila og reference number ug ilang atimanon ang problema.
* * *
Nag-text ko sa 8888 pasado alas-6 sa gabii niadtong Biyernes (Pebrero 20). Sa pasado alas-8 sa Sabado sa buntag (Pebrero 21) nakadawat ko og laing text nga ang akong reklamo gihatagan nila og ticket reference number ug gipadala na sa hingtundang ahensiya sa gobyerno.
Niawhag nga kon duna koy ebidensiya sa reklamo mahimong ipadala sa 8888complaintop.gov.ph. Ako dayong gi-email ang soft copy sa guarantee letter ni Ouano. Nitambag pa gyod nga kon gusto kong mahibawo unsay nahitabo sa reklamo makatawag ko sa 8888 nga libre human sa 72 ka oras (tulo ka adlaw).
* * *
- Latest
