Utang sa MAIFIP

Mireklamo ang Private Hospitals Association of the Philippines, usa ka kahugpongan sa mga pribado’ng hospital, sa kalangay sa gobiyerno pagbayad sa kapin P400 million nga medical services nga ilang gihatag ubos sa Medical Assistance for Indigents and Financially Incapacitated Patients (MAIFIP).  Kini’ng pagpabaya sa gobiyerno mahimong hinungdan nga mahikawan ang katawhan sa gikinahanglan nga medical care, nga gigarantiyahan unta sa atong mga healthcare laws.  Mahinungdanon nga mahatagan gilayon kini’g pagtagad sa kagamhanan.  Kay matud pa lage, “Tulo lamang ang matang sa katawhan sa Pilipinas, kadto’ng medyo arangan, kadtong mga way nahot ug kadto’ng walay ikapa-tambal.”  Madahaan!

Duna na’y basolon

Namahayag si Palace Press Officer Undersecretary Claire Castro nga dili mahinungdanon alang sa presidente ang presidential bid karong 2028 ni Bise Presidente Sara Duterte ug gihatagan una niya’g pagtagad ang mga isyu sa nasud.  Sukwahi kining pamahayag sa mga opinion ug obserbasyon sa mga political analysts kabahin sa pagdeklarar sa bise presidente.  Labaw pa’ng wala mahiuyon ang lihok sa Malacañang human gihimo ang pagdeklarar.  Tataw nga takuban lang kining pamahayag ni Castro.  Morag haum ang lihok sa Malacañang sa panultihon nga, “Kadtong mapahiyomon gihapon bisan taliwala sa krisis, aduna na’y napalgan nga angayan basolon.”  Fezteleern!

Aduna na’y gidapigan

Gikahinangop ni Cebu Governor Pamela Baricuatro ang pagdeklarar ni VP Sara Duterte nga mokandidato pagka-presidente karong 2028 apan gihimug-atan usab niya nga ihikling lang una niya ang pamolitika karon tungod sa kadaghan pa sa mga bulohaton sa Kapitolyo.  Sagad sa mga politiko dili una moyagyag sa iyang politikanhong baraha ni’ng sayo pa.  Apan sayod kita nga sa tinuoray nga kahimtang, “Ang mga lokal nga politiko adto gayod modapig sa modaugay ug dili ngadto sa pldihonon.”  Mao maan!

Bato nga ipukpok sa ulo

Gisalindot sa mga sakop sa Kongreso ang pagtoo nga ang anti-political dynasty bill gitumong ngadto sa mga pinili lamang nga political families sama sa banay’ng Duterte.  Alang kanila, mas labing maapektohan ang mga sakop sa kongreso tungod kay sagad kanila nagagikan man sa politikanhong banay.  Gitumong unta sa maong balaodnon nga malikayan nga mahimo ang gobiyerno nga pribadong negosyo sa mga politiko.  Apan padayon ang paghiko-hiko sa mga kongresista sa pagpasar sa maong balaod sulod sa dugay na’ng panahon.  Kay matud pa, kon pandayon ug ipasar nila ang anti-political dynasty law, ”Sama ra’g nagpunit sila’g bato ug giunay pagdukdok sa ilang ulo.”  Pagkatoytoy!

Maka-adik ang sugal

Giangkon sa TV host ug magpapatigayon nga si Willie Revillame nga mokabat sa kapin P1 billion sa iyang kwarta ang napilde sa pagpunay niya’g sugal sa casino.  Gihulagway ni Revillame ang nahitabo kaniya nga usa ka mapait apan bililhon nga pagtulon-an.  Ang kinauyokan nga suliran sa pagpanugal mao ang kalisod sa pag-undang kon makasulod ka na sa maong bisyo kay matud pa, maka-adik ang maong bisyo.  Kay gina-ingon man lage nga, “Malisod ang pag-undang kon magsige ka’g daug apan mas labing malisod ang pag-undang kon magsige ka’g kapilde.” Muleeng!