Dalan sa Krus

Nahimong balansayon matag Kwaresma ang Dalan sa Krus. Gisugdan kini ni San Francisco de Asissi sa Italya. Kini tungod kay dili tanang mga tawo ang dunay kahigayonan nga makahimo og pilgrimage ngadto sa Holy Land.

Gituyo kini aron ang tanan makahimo gyud sa pagpamalandong ug pag-ampo sa mga kasakitan sa atong Ginoo.

Ang maong debosyon nikaylap sa tibuok kalibutan, lakip na ang atong nasud nga Pilipinhon.

Ang krus ingon nga mahinungdanong kabahin sa atong kinabuhi ug pagtuo nga Kristohanon nipahinumdom kanato nga kabahin diay kita sa panaw padulong niadtong altar sa krus nga gisubli subli og saulog sa Santos nga Misa.

Nagdasig usab kini kanato nga atong hangpon ang atong krus pas-anon nato kini ingon nga atong pag-ambit sa kasakit ni Kristo nga nagpakamatay alang kanato.

Ang Krus atong kaluwasan.

Ang krus atong kadaugan. Kun diin namatay ang atong Ginoo didto usab niya gibuntog ang karaang kaaway nga mao ang yawa.

Mao nga ang yawa nga maoy prinsipe sa tanang bakak ang nabuntog sa kamatuoran ug kinabuhi nga mao ang atong Ginoong Jesus.

Atong panghinaut nga kining maong debosyon dili lang mamahimong usa ka tulumanon kondili mamahimo usab nga mahinungdanong kabahin sa atong Espirituhanong kinabuhi.