EDITORYAL - Espiya diay

Lain na sad gidudahang espiya sa China ang nasakpan dinhi sa Pilipinas ug ning higayona naa gyud nag-operate sa probinsya sa Zambales nga nag-atubang sa West Philippine Sea diin sab nahimutang ang daghang mga military bases sa nasud ug ingon man EDCA sites sa US. Sa tulo ka nakalabay nga mga tuig, ubay-ubay na nga mga gidudahang espiya sa China ang nangasakpan dinhi, usa nila ug baniog kaayo mao ang kanhi mayor sa Bamban nga si Alice Guo nga ang tinuod nga pangalan mao si Guo Hua Ping.

Sunod kadtong mga Chinese nationals nga nangadakpan sa managlahing higayon ug mga lugar nga naaktohang luwan og mga sakyanan nga dunay mga real-time satellite connections ug mapping gadgets samtang naglibot-libot duol sa mga kampo sa AFP. Ug duna pay uban nga konektado sa gi-ban nga POGO.

Sa unang paggawas sa balita sa miaging semana sa Zambales, daghang mga netizens ang mi-react.

Apan dunay pipila nga gisaway hinuon ang mga otoridad ug gilabanan siya kay lagi wala nay laing nakita ang gobiyerno batok sa China.

Apan ning bag-o, si National Security Adviser Eduardo Año mibutyag nga dili kini ordinaryong student pilot. Usa siya ka Mongolian national nga mianhi sa Pilipinas aron moeskuyla pagka-piloto. Diay to, ang suspek nga si Boldbaatar Bold-Erdene aktibong sakop sa Chinese military ubos sa People’s Liberation Army- Air Force (PLAAF) ug usa siya ka fighter jet pilot.

Kani palang daan, makaduda na gyud iyang tuyo pag-eskuyla dinhi og pagka-piloto. Nganong kinahanglan man siya moeskuyla pagka-piloto nga gradwado naman diay ni siya sa Defense University of Mongolia ug sa Civil Aviation University of China ug sa PLA Air Force Aviation University ug lisensiyao siyang fighter jet pilot?

Matud pa sa Bureau of Immigration, usa ka kini ka dakong kalapasan sa Immigration Law ang  wala pagtug-an sa tinuod niyang background.

Nasakpan siya tungod sa pagkuha niya og mga hulagway sa mga tugpahanan, mga dagkong suba sa Zambales nga duol sa mga kampo sa AFP ug sa mga EDCA sites sa US. Pila pa kaha ka mga sama ani nga espiya nga naa karon sa Pilipinas?