Kawsa ni Katherine
Nahibawo siya sa kataas ug kakutas sa husay sa kaso. Sa kalisod sa pagsagubang sa tanang komplikasyon sa pagpangita og hustisya. Sa kasakit sa paglab-as sa korte sa duguong mga detalye sa bangis nga kamatayon sa iyang anak. Tungod sa hubog nga nagpaturagas sa iyang sakyanan.
Sakop siya sa pamilya nga wala igdungog nga mangita og away. Gipadako sa iyang mga ginikanan nga nilikay sa mga paukyab ug nitutok sa pagkugi ug pagpaningkamot. Malampuson siyang negosyante. Nasuhito nga mas maayo ang pakigsabot kay sa pakigbangga. Pero wala siyay kapilian.
* * *
Mas sayon unta ang pagpakahilom. Pagluom na lang sa pagbangotan sa pagpahimutang sa iyang anak sa kataposang pahuwayanan. Paghangad na lang sa langit. Nga sa wala niyay kinutoban nga kaalam, ang Ginoo labing takos nga mopahimutang sa tanan.
Pero iyang kaligdong dili makatugot nga magpabiling gawasnon ang hulga sa dugang inosente nga mga kinabuhi sa kadalanan. Iyang katarung nag-awhag paghimo og gamayng tampo. Sa pagdasig sa mga ahensiya sa gobyerno pagtuman sa ilang trabaho. Ug pagpatuman sa mga lagda aron maseguro nga mas luwas nga puy-an ang iyang pinanggang Sugbo.
* * *
Maong niginhawa siya og lawom. Nanukad pagsagubang sa wala pa nila mailhi nga mga pagsuway. Nipalig-on sa iyang kaugalingon para sa pakigbisog nga wala pa sukad niya masinati.
Bisan sa pasiunang mga maniobra nga iyang nakit-an (pagsabotahe sa ebidensiya ug imbestigasyon), wala siya mawad-i og paglaom. Nga ang isog nga pagbarug sa usa ka inahan posibleng makapanghimakak sa bugal-bugal. Nga ang mga balaod sa Pilipinas morang balay sa lawa-lawa: Ang langaw masangit, ang kabaw molusot.
* * *
Mangaliya kita para ni Katherin Cheng. Nga unta magpabilin siyang lig-on. Bisan kon ang mga lagda sa iyang kawsa dili makiangayon. Bisan kon ang kalig-on sa iyang mga ebidensiya matabonan sa mas gamhanang mga koneksiyon.
Dili nato siya pasagdan. Bisan duna nay motumaw nga bag-ong mga eskandalo ug kontrobersiya dili nato kalimtan ang kamakiangayon sa iyang tumong. Ang iyang pagbarug dili lang para sa iyang kamaguwangan nga anak nga si Kingston. Ang iyang kadaogan para sab sa mga nag-una ug simbako sa mosunod pa nga mga biktima. Nga walay samang tingog ug lahutay. Sa pagsukol sa gahom ug impluwensiya.
* * *
- Latest
