EDITORYAL — Peligro sa CSCR

Panahon na gyud nga pabutangan og road safety measures ang Cebu South Coastal Road tungod aning mga aksidente nga nikalas na og kinabuhi ug pagkaguba sa mga kabtangan.

Niadto lang Valentine’s Day, namatay gyud ang magtiayong senior citizens nga taga Sawang Calero, Cebu City. Ang lalaki hepe diay sa mga barangay tanod sa maong barangay.

Diha sila sa South Road Properties aron magselebrar sa Valentine’s Day kauban ang ilang mga anak ug mga apo. Human nakapanihapon sa usa ka sikat nga fastfood chain sa lugar, nisuroy ang duha aron magpahangin.

Pero sa ilang paglabang balik padung sa ilang mga anak, diha na nahitabo ang aksidente. Walay nasayod kun nganong wala makabantay ang drayber sa delivery van nga duha man ni sila ka tawo nga nilabang?

Wala diay siya mogamit og headlights? Ngitngit ba ang lugar tungod kuwang og mga suga ang mga poste?

Ang CSCR usa sa mga labing busy kaayo sa traffic kada adlaw kay nagkonektar kini sa Cebu City ug sa silingang siyudad sa Talisay City nga maoy agianan padung sa mga lugar sa habagatang bahin sa probinsya sa Sugbu.

Apan dili lamang kini superhighway  kondili usa sab kini ka business ug commercial area tungod sa presensiya sa usa ka dakong mall, ocean park, theme park, dakong hotel, casino, high-end subdivision, mga botiques, food stalls ug daghan pang uban nga makaagni og mga tawo.

Ayaw ta’g ingna nga kani tanang mga establisamentong gitukod sa SRP, para lang sa mga tawong dunay awto o mga sakyanan?  Kana diay’ng mga nagtrabaho diha duna diay na sila tanan awto o motorsiklo?

Kuwang kaayo ang pedestrian lanes, kinahanglan tingaling magtukod na og mga overpass duol sa mga establisamento aron luwas nga makalabang ang mga tawo.

Apil sa gireklamo sa mga motorista sa lugar mao ang kakulang sa U-turn slot kay adto pa sa tumoy mosuong ilawom sa taytayan sa utlanan sa Talisay ug sa tiilan sab sa viaduct ug sa CCLEX diha sa may Ludo.

Dili na unta mapun-an ang nangamatay diha sa CSCR tungod sa wala pagbuhat sa mga angay buhaton sa kagamhanan sa Cebu City.