EDITORYAL — “Sa presinto ka na Magpaliwanag”

Panahon na tingaling balikan og tan-aw ang kasamtangan natong mga balaod bahin sa mga aksidente sa trapiko tungod kay dunay mga insidente nga ang motorista bisan siya maoy naa sa lugar ug wala milapas sa balaod sa trapiko sila man gihapoy pasakaan og kaso.

Kinahanglan kini para sa kaayohan sa mga responsableng mga drayber nga nigamit sa mga karsada kada adlaw. Dili man gud garantiya kanunay nga ang responsableng drayber dili gyud makasugamak og aksidente.

Tinuod hinuon nga magdepende kining tanan sa mga traffic investigators kung sila neutral ug matinud-anon gyud sa ilang trabaho. Kay usahay anha magka-deperensiya sa ilang interpretasyon sa nahitabo ug maoy ilang isuwat sa ilang report.

Sama nalang pananglitan sa nahitabo niadtong Pebrero 11 diin usa ka 23 anyos nga estudyante ang namatay human siya nabanggaan human kini nilayat gikan sa plataporma sa LRT sa EDSA. Kang kinsa man kadtong sala, sa drayber o sa maong tinun-an?

Ang drayber gikustodiya sa kapolisan aron imbestigahon, mura og nangita sila og buslot aron kini maoy papanubagon sa nahitabo.

Pero sa nahitaboan palang, daghan na unta silang nakita nga makatabang sa drayber sama sa sirkumstansiya ug mga pamahayag sa mga testigo.

Maayo nalang nga dunay CCTV camera sa lugar ug sa pagsige og balik-balik nila og review, nakita nga wala gyud bisan gamay nga traffic violation ang drayber maong ilang gibuhian. Sa laktod “sa presinto ka magpaliwanag” estilo.

Daghan na kaayong aksidente sa kadalanan nga diin ang drayber maoy pirmeng naalaot tungod sa pamaagi sa pag-imbestigar sa mga traffic investigators. Dili na makatarunganon usahay.

Sa kana palang pag-kostudiya samtang nagpadayun ang imbestigasyon hasol na kaayo sa habig sa drayber kay naapektahan gyud ang ilang normal nga bulohaton.

Maayo kining plano ni 4Ps party-list Rep. JC Abalos nga maghimo gyud og balaod pinaagi sa giduso niyang House Bill (HB) 110 o “Philippine Responsible Driving and Accountability Act.”

Kani para gyud sa kaangayan ug patas nga tulobagon sa mga partido nga malambigit sa mga aksidente sa kadalanan. Aron mahunong na kining mentalidad sa publiko ilabi na sa kapolisan nga pirmeng pakasad-on ang mga drayber.