BBM angay'ng apilon
Kon mangulo si Cebu Archbishop Abet Uy og protesta batok sa P1.7 trillion flood scam karong Pebrero 25, dungan sa ikatulong Trillion Peso March pagtimaan sa ika-40 nga anibersaryo sa Edsa People Power Revolution, mokuyog gihapon ko. Pero managana na ko og uyon kon dili gihapon tukion ang nagbuntaog nga mga ebidensiya sa posibilidad nga si Presidente Ferdinand Marcos Jr. ang labing kawatan.
Ang kabalaka nga mas sayo nga makapuli si Bise Presidente Sara Duterte sa Malakanyang dili igong sukaranan nga lingiwan ang mas dakong kawat sa Marcos administration.
* * *
Gitudlo sa atong katiguwangan nga angayng badlungon ang tanang klase sa kawat. Bisan pilay gikawat. Maong supak ko sa:
• Pag-insistir sa mga dumadapig ni Sara nga gamay rang P612.5 milyones nga gipasangil nga nakawat sa iyang confidential funds kay sa binilyon ka pesos nga gibolsa sa flood control projects sa unang tulo ka tuig ni Marcos; ug
• Awhag sa mga dumadapig ni Marcos nga unahon pag-impeach si Sara sa dili pa gukdon si Marcos kay peligrong magkaguliyang ang nasud kon mailog ni Sara ang palasyo sa dili pang 2028.
* * *
Mas makiangayon nga tukion nato ang tanang kawat bisan kinsay hingtungdan ug bisan kinsay maig-an:
• Malasaw ang kawsa kon igo lang maningil ni Sara kinsa si Mary Grace Piattos ug ubang pekeng mga ngalan nga nakadawat sa iyang confidential funds.
• Sa walay pagsukmat ni Marcos nganong gipirmahan ang budgets sa 2023, 2024 ug 2025 bisan sa allocables ug non-allocables sa mga kongresista, mga senador, mga sakop sa gabinete ug, kon tuohan ang bag-ong mga pasangil, niya mismo?
* * *
Usa sa mga rason nganong dili na sama kamalaumon ang katawhan nga masilotan ang labing dakong kawatan sa flood scam mao ang klarong pinili nga imbestigasyon sa Ombudsman, Senado ug Department of Public Works and Highways:
• Agresibo kaayo sila batok sa mga kaatbang sa administrasyon nga silang kanhi Senate President Chiz Escudero ug mga Senador Jinggoy Estrada ug Joel Villanueva; pero
• Kalit lang nga dili na interesado sa gibisto ni Senador Ping Lacson sa posibleng kalambigitan sa mga sinaligan ni Marcos nga silang Adrian Bersamin, Trygve Olaivar, Amenah Pangandaman, Lucas Bersamin ug Jojo Cadiz.
* * *
- Latest
