Insulto

Ang pait nga kamatayon sa batan-ong negosyante nga si Kingston Ralph Cheng usa ka dakong leksiyon nga atong makutlo gikan sa resulta sa pagmaneho ubos sa impluwensya sa ilimnong makahubog.

Namatay ang maong batan-on tungod sa giingong danghag ug hubog nga pagmaneho sa 21-anyos nga si Sean Andrew Pajarillo.

?Ang maong trahedya dili lang usa ka ordinaryo nga aksidente sa dalan.

Kini nagpadayag usab sa dakong buslot sa atong balaod ug sa kakuwang sa kaisog sa atong sistema sa hustisya sa pagpahamtang og bug-at nga silot sa mga nakalapas.

?Sa pagkakaron, ang suspek nag-atubang og kasong Reckless Imprudence Resulting in Homicide. Ang sakit nga kamatuoran mao nga nakagawas ang suspek human makapiyansa kini og P72,000.

Alang sa pamilyang nawad-an og mahal sa kinabuhi, ang maong kantidad daw usa ka insulto. Ug kini nagpakita lamang nga ang atong balaod mas pabor sa mga makasarang sa pagbayad kay sa pagpanalipod sa kinabuhi sa publiko.

?Mao nang panahon na nga i-repaso ang Republic Act 10586 (Anti-Drunk and Drugged Driving Act of 2013). Dili igo ang multa ug mubo nga pagkabilanggo kon dunay kinabuhi nga nakalas.

?Dili na nato paaboton nga duna pay laing Kingston Cheng nga mamahimong biktima sa dalan. Ang hustisya dili mahimong matubos lang sa pipila ka libo ka pesos.

Ang kinabuhi sa tawo bililhon, ug ang drayber nga mokuha niini tungod sa iyang pagkahubog ug pagkadanghag kinahanglan makatilaw usab og bug-at ug tinuod nga latigo sa balaod.