EDITORYAL - Planado ug sistematiko?

Gipangalanan na sa International Criminal Court ang uban pang mga opisyales sa Pilipinas sa panahon sa administrasyon ni kanhi presidente Rodrigo Duterte may kalabotan sa dugoong war on drugs ug mga extra-judicial killings sa dihang siya pay mayor sa Davaot City.

Apil sa gipangalanan mao ang duha ka mga senador, mga heneral sa Philippine National Police, National Bureau of Investigation , abogado, ug uban pa apil ang mga polis nga wala pa hinganli.

Gihulagway sila nga mga opisyales nga dunay dakong posisyon ug gahum atol nga si Duterte pa ang mayor sa Davao City ug sa dihang siya nay presidente sa nasud.

Panahon kun kanus-a nahitabo ang daghang pagpatay sa mga gidudahang drug personalities ubos sa nagkalain-laing operasyon sa kapolisan gikan sa Tokhang ug ang mga kaso sa “nanglaban.”

Apan dili tanang napatay nga drug personalities sama sa nahitabo sa 5-anyos nga bata sa barangay Ermita sa Cebu City, ang kamatayon sa duha ka menor de edad sa Quezon City nga diin nasuta sa imbestigasyon nga nag-apas ang mga polis nga nakapatay kanila sa reward.

Usa unya sa sutaon sa ICC kun kaning mga pagpatay resulta lang ba sa pagpasagad sa mga opisyales sa panahon ni Duterte nga niresulta sa naghinobra nga pagabusar sa mga otoridad kay walay nibadlong kanila sa pagpahigayon sa war on drugs.

O kun planado ug sistematiko gyud kining gibuhat. Nga ang gibuhat sa Davao City nga diin gipangpatay ang mga gidudahang mga kriminal, gipalapdan kini ug gibuhat na sa tibuok nasud sa dihang si Duterte na ang presidente.

Wala pay mga balita kun dunay gipagawas nga mga warrants of arrest batok sa mga gipanganlang mga opisyales ug kun unsay buhaton sa kasamtangang administrasyon kanila.

Sikupon ba sila sama sa nahitabo kang Duterte o dili. Usa kini ka dakong hagit para sa  PNP ilabi na nga ilahang mga kanhi kaubanan sa buhat ang uban sa gipangalanan.