Padayon ang pagtibugsok

Segun sa 2025 Corruption Perception Index (CPI) nga gimantala sa Transparency International, sagunson ang paglusno sa Pilipinas sulod na sa tulo ka tuig, sa kalibutanon’g ranking nga nagsukod sa kakuyanap sa kurapsyon sa mga nasud.  Ang eskandalo sa flood control projects maoy gitumbok nga labing dakong hinungdan.  Wala maka-alibyo sa paglusno sa ranking ang pasalig sa administrasyon nga taralon gayod kadtong hingtungdan’g kurap nga opisyal.  Komento pa sa akong palahubog nga amigo, “Wala na’y paglaum ang Pilipinas kay daw mas daghan pa ang mga buang nga naa sa gobyerno kon itandi sa mga anaa sa mental institutions.”  Fezteleern!

Dili sundon ang ilaga

Mipasidaan ang Chinese Embassy nga ang laraw sa ubang mga senador sa pagdeklarar nga “persona non grata” sa usa ka Chinese diplomat makaguba sa economic ties tali sa China ug Pilipinas ug makaapekto sa minilyon nga trabaho alang sa mga Pinoy.  Sa kadako sa ekonomikanhong gintang sa duha ka nasud, angayan nga maghinay-hinay ug pensaron pag-ayo sa mga sendador ang implikasyon sa ilang pagabuhaton ug dili mahimo nga mopatigbabaw ang garbo.  Dili angay sundon ang gibuhat sa ilaga nga mipa-ak sa dalunggan sa elepante nga sa dihang wala kini tagda sa naulahi, nakaako pa gyud ang ilaga pagpangutana nga “Gisakitan ka ‘Te?”  Ateerr!

Saad nga gilumotan

Adunay bag-ong pagla-um nga midan-ag sa Cebu City Medical Center (CCMC) human mopahigayon og usa ka groundbreaking event ang mga lokal nga opisyal pinangulohan ni Mayor Nestor Archival alang sa pagkompleto na sa maong hospital.   Usa unya kini ka dakong kalampusan ni Archival kon matuman ang iyang saad nga ikahinangop pag-ayo sa mga Sugbuanon.  Dinhi na unya masukod ang matang sa liderato sa mayor.  Kay matud pa bitaw, “Kadtong mga tawo nga adunay maayong katuyoan, mohimo og mga saad; apan kadtong adunay maayong kinaiya, motuman gayod sa ilang saad.”  Muleeng!

Love scam

mipasidaan ang NBI-7 nga adunay pagdagsang sa mga “love scams” ni’ng bulan sa Pebrero diin gisaulog usab ang Valentine’s Day.  Ang modus sa “love scam”mao nga adunay magpatoo nga usa siya ka romantiko nga partner nga modani sa pagsalig sa iyang biktima ug dayon mokumbinsi niini sa pagpahatag og kwarta.  Puntingon sa mga scammer kadtong mga masulob-on ug nag-inusara.  Sayon ra ilhon ang mga love scammers kay sagad mao kini linya sa ilang atik, “Wala pa ko mobati og sama niini nga matang sa paghigugma ngadto kang bisan kinsa kon dili kanimo lang….pahuwama sa ko’g kwarta bi.”  Pagkatoytoy!

Pagpanlimbong sa relasyon

Sa survey nga gipahigayon sa Social Weather Stations (SWS), usa sa upat ka Pinoy (27%) ang naksinati o ba kaha nakakita og mga pagpanlimbong sa ilang relasyon.  Nagkalain-lain nga matang sa pagpanglimbong ang nasinati sama sa sexual nga pakiglambigit sa uban o ba kaha pinaagi sa cyber cheating.  Aduna gyuy mga binuhat nga dali madala sa tentasyon.  Sama kuno sila sa “bra” nga mokaw-it samtang nagtalikod.  Matud pa bitaw sa pagya-komedya, “Manguwag mn gani ang wati nga yuta ra’y kinaon, ang tawo pa kaha nga daghan og vitamins.”  Madahaan!