Labaw sa balaod
Tan-awa unsa kalangay ang paglihok sa sistema sa hustisya kay ang suspek sa kasong pagpatay, 21 anyos nga si Sean Andrew Pajarillo, sakop sa dato nga pamilya ug anak sa sakop sa Tiger Group sa Highway Patrol Group (HPG):
Naabtan og kapin sa 18 ka oras una nahimoan og physical examination kon hubog ba, kay walay kahimanan ang Chong Hua Hospital (CHH) sa Mandaue ug Cebu City Medical Center para sa alcohol test; ug
Naabtan og lima ka adlaw una napasaka sa korte ang iyang kasong reckless imprudence resulting in homicide.
-o0o-
Nahibawo tang tanan nga kon kargador sa pantalan pa lang ang suspek, paspas pa sa alas-kuwatro nga gideklarar nga hubog tungod sa field sobriety test bahala na nga wala diay bisan usa na lang ka breath analyzer ang mga ospital sa kinadatoan nga probinsiya sa Pilipinas.
Nangaging mga kaso nagtug-an nato nga kon anak sa manananggot pa lang ang nag-drive sa sakyanan nga nakapatay og biktima, nakulatahan, naposasan ug napasakaan dayon og kaso sa korte, nga kasagaran dili nang kagawas sa prisohan kay walay ikapiyansa ang iyang mga ginikanan.
-o0o-
Hilom ang mga imbestigador sa kaso ni Pajarillo kon napaubos ba siya sa drug test nga gisugo sa Republic Act No. 10586, o Anti-Drunk and Drugged Driving Act (ADDA) sa 2013, para sa drayber sa sakyanan nga naaksidente ug nakapatay o nakaguba og kabtangan.
Maglisod og lusot ang mga doktor sa CHH Mandaue ug CCMC nga walay kahimanan sa drug test. Mas lisod ipasabot kon walay nagsusi nakasuyop ba og ilegal nga drugas si Pajarillo.
-o0o-
Kon dili ikiha ang kadagkoan sa CHH Mandaue, sama rang niangkon ang Cebu City Police Office (CCPO) nga mahimo rang kengkoy ang ilang mga imbestigador kay wala pasudla sa pribadong ospital sulod sa 18 ka oras aron lang ingnon nga dili kahimo sa ilang giawhag nga chemical tests.
Kon walay masilotan sa mga imbestigador sa CCPO, sama rang gitugotan ang mga polis sa pagyango sa tanang sugo sa pamilya sa suspek basta nga kon pasanginlan nang tua kapusta sa pikas managinot dayon og dakop og lima ka bouncers aron ingon nga isog diay silang mopatuman sa balaod. [30] [email protected]
- Latest
