EDITORYAL — Tensyon sa Carbon

Daghan na ang naningog nga mga konsehal sa dakbayan sa Sugbu kabahin aning isyu sa modernisasyon sa Carbon Public Market.

 Mao ni ang pinakadako ug pinaka-karaang merkado publiko sa Cebu ug gani, bisan ang mga taga Mindanao ug mga silingang mga probinsya anha sab mangompra para sa ilang gipangitang produkto.

Anha sab kasagaran pangdad-on ang mga abot sa umahan ug kuha sa mga mananagat dili lang gikan sa Sugbu kondili hasta pud ang gikan sa mga silingang probinsiya tungod kay dili mahitabong dili mahalin kay daghan ang pumapalit.

Apan ang mga karaan ug mga bag-ong vendors nabalaka aning join ventures tali sa kagamhanan sa siyudad ug aning pribadong kompanya nga Megaworld nga maoy nigasto para sa modernisasyon sa maong merkado.

Apil sa ilang gikabalak-an mao ang pagsaka unya sa abang sa matag stalls, basin kuno dili na sila makabawi, o ba kaha mawad-an sila og mga kostumer kay mapugos sila pagpasaka sa presyo tungod sa kamahal sa abang ug daghan pang uban.

Kaning Megaworld usa kini ka negosyo, namuhonan, nipagawas og kwarta para aning ilang JVA nga mao ang pagpanindot sa maong merkado, limpyo ug hamugaway nga para sa kaayohan sa tanan dili lang para sa mga vendors kondili hasta pud sa mga mamalitay.

Natural sab nga dunay mga kondisyon kaning ilang JVA aron sila makabawi sa ilang gastos. Pagkatinuod dako na og kausaban sa Carbon karon kun itandi kaniadto, apan kuwang pa kini.

 Apan anhing dapita nitumaw ang daghang kwestyon gikan sa mga vendors, kay wala daw sila makahibalo kun unsa kining mga kondisyones.

Ang mga kahugpongan sa mga vendors miingon nga dili sila supak aning modernisasyon, apan dili unta moresulta sa pribatisasyon sa maong merkado kaning JVA.

Ang pribatisasyon  man gud, wala nay tingog ang mga vendors, ang management nalang tanan maoy magbuot ug magdiktar sa tanan, gikan sa seguridad, kalimpyo, enerhiya, tubig, ug daghan pang uban nga makaapektar sa panginabuhian ug sa mga konsumidor.

Kun giklaro palang unta ni og maayo sa pagsugod palang dili ni mosangpot sa ingon ani ang isyu. Kinahanglan gyud nga ilaha kining klaruhon ug walay mga sekreto kay anhi gyud tanan magkagubot.