Kadako sa problema

Gimandoan na sa Metro Cebu Water District (MCWD) ang ilang mga private water suppliers nga pakubsan ang ilang isuplay nga tubig, ug nagpasabot kini nga pipila ka adlaw gikan karon, mohinay pagsamot ang agas sa atong mga gripo.

Isip usa sa mga konsumedor og tubig sa MCWD, moapil ko paghangyo sa MCWD Board nga gipangulohan ni Mr. Ruben Almendras nga bakwion unta nila ang pagpamenos sa gidaghanon sa tubig nga kuhaon nila gikan sa mga private suppliers.

Bisan pa og pakusgan nila’g andam ang mga bomba sa ilang pipila ka wells, dili gihapon kini makatapak sa gidaghanon sa tubig nga mawala kon mosugod na pag-iban sa gidaghanon sa suplay ang mga water suppliers.

Gani si Cebu City Councilor Alvin Arcilla nakasabot niini nga isyu nga dili tukma nga ibanan ang gidaghanon sa tubig nga paliton sa MCWD gikan sa mga water suppliers, kay manginahanglan pa man gani ta og dugang tubig.

Mao ni ang akong giingon nga dakong problema sa mga konsumedor og tubig sa mga dapit sa Barangay Pit-os, Talamban, Bacayan, Pulambato, Agsungot ug uban pa nga barangay, kay sa dili madugay mohinay ang agas sa ilang mga gripo.

Nakadawat na og kamandoan gikan sa MCWD ang JE Hydro-Bio Energy Corporation, ang supplier og tubig sa MCWD nga nagkuha og suplay gikan sa Barangay Lusaran, aron gikan sa 20,000 cubic meters (100,000 ka baril) nga tubig, pakubsan kini ngadto na lang sa 15,000 cubic meters.

Sa ato pa, ang ipadayon sa MCWD mao na lang ang unang kontrata nga gipirmahan nga ang JE Hydro mosuplay og 15,000 cubic meters nga tubig gikan sa Lusaran direkta sa Barangay Busay, ug dawaton kini sa linya sa MCWD.

Ang ikaduhang kontrata sa MCWD ug JE Hydro, alang sa pag-supply ug dugang 15,000 cubic meters, aron mahimo unta nga 30,000 cubic meters ang masuplay sa JE Hydro sa MCWD, dili na nila dawaton.

Sa ato pa, siguradong manghilak ang mga lumolopyo sa mga barangay nga atong nahisgotan kay mohinay man ang agas sa ilang mga gripo, ug posible pa nga dili sila makasawaod og tubig.

Natan-aw nako niini nga isyu, dunay wa mahibaw-i sa bag-ong MCWD Board nga gipangulohan karon ni Sir Ruben Almendras. Pagka karon ang JE Hydro, makasuplay gyud unta og 30,000 cubic meters nga tubig kada adlaw, apan kay gidid-an na man sila, mapugos sila pagsirado sa ilang mga valves diha sa Talamban ug Pit-os area.

Nahibaw-an nako nga ang mga kapitan sa mao nga mga barangay, nabalaka kaayo niini nga kalamboan, ug apil sila nga naghangyo nga usbon sa MCWD ang ilang hukom.