EDITORYAL - Hubaran, nasa likod ng agri smuggling
WALANG ipinagkaiba sa iba pang corruption scandal partikular na ang maanomalyang flood control projects ang agricultural smuggling. Maraming sinira ang flood control scandal lalo ang kabuhayan ng mga residente. Winasak ng baha ang kanilang buhay at ari-arian.
Ang agri smuggling sinisira ang kabuhayan ng mga maliliit na magsasaka. Dahil sa hindi masawatang smuggling ng mga agri products—bigas, sibuyas, carrots, karne at iba pa, wala nang kinikita ang mga lokal na magsasaka. Dahil mas mura ang smuggled na gulay, hindi na binibili ang local produced. At kahit na may Anti-Agricultural Economic Sabotage Act patuloy pa rin ang smuggling ng agri products. Talamak ang smuggling na hindi na kinatatakutan ang batas.
Hanggang ngayon, wala pang nasasampolang agri smugglers sa kabila na ilang beses na itong binantaan ni President Ferdinand Marcos Jr. Ilang beses na niyang binanggit sa kanyang State of the Nation Address (SONA) ang pagbabanta sa agri smugglers subalit walang nangyari. Patuloy ang mga nananabotahe sa ekonomiya ng bansa. Kailan may makikitang nakakulong? O katulad din ito ng flood control scam na hanggang ngayon walang “malaking isda” na nalalambat.
Naniniwala si Sen. Francis Pangilinan na may “malaking tao” na nasa likod ng agri smuggling. Hindi aniya makakakilos ang mga smugglers kung walang malaking financiers. Binanggit ni Pangilinan ang P133 milyon na smuggled mackerel at sibuyas. Napakalaking halaga nito kaya hindi raw siya naniniwala na walang malaking tao na nasa likod nito. Binanggit ni Pangilinan ang Atara Marketing Inc. na nakapag-i-import ng bilyong pisong agri products. Maari raw bang paniwalaan na walang malaking financier ang kompanya.
Ayon pa kay Pangilinan, ang Atara ay nasa likod umano ng importasyon ng bigas na nagkakahalaga ng P7 bilyon ilang taon na ang nakararaan. Isa umanong may apelyidong “Lumbang” ang may papel sa importasyon ng bigas. Ipagpapatuloy umano ng komite ni Pangilinan ang pag-iimbestiga rito. Huhubaran umano nila ang nasa likod nang malawakang agri smuggling na may malalaking financiers.
Nakadidismaya na kahit may batas laban sa agri smuggling ay patuloy pa rin ang malawakang pagpupuslit ng mga produkto. Napag-alaman din na hindi lamang ang pagkalugi ng pamahalaan at pagkawala ng ikinabubuhay ng mga lokal na magsasaka ang masamang resulta ng agri smuggling. Naghahatid din ng peste ang mga smuggled na gulay. Dahil hindi dumaan sa tamang proseso, ang mga smuggled vegetables, posibleng may taglay na heavy metals na delikado sa consumers kapag nakain.
Ang pagkilos ng pamahalaan laban sa agri smugglers ay nararapat paigtingin. Maawa sa mga magsasaka at sa ekonomiyang sinasalaula.
- Latest
