Mga scammer nga mipuntarya sa mga turista sa Isla

Matahom ug makabibihag ang Bantayan Island nga walay dili madani nga mga tawo ilabi na kadtong mga bisita, ang domestic ug mga langyaw nga turista, ilabi kong panahon sa Semana Santa tungod sa lahi nila nga kultura sa isla diin sila ra ang gitugotan nga makakaon og lechon o bisan unsa nga pagkaon sa karneng baboy. Kong beach ang hisgotan pino ang bas ug mora’g kamay nga seguradong makaengganyo sa mga tawo. Apan taliwala niining tanan, dili kakompyansahan kay dunay mga tawo nga gustong modaut sa reputasyon sa Bantayan Island, kadtong mga kawatan nga migamit karon og online platform sa ilang pagpangilad. Luoy intawon kaayo ang mga turista nga mabiktima makahinayak na pag-adto unya wala diya na booked sa hotel nga gigamit lang ang ngalan nga mao unta ang ilang estahan.

Miaksiyon na ang hotel and resort industry sa isla kinsa nagkahiusa sa pagdangkop sa National Bureau of Investigation ug sa Philippine National Police sa pagsulbad sa online scam. Gibutyag sa presidente sa One Island Tourism Association kon OITA nga si Nelson Yuballos nga gisundog sa mga scammer ang ilang social media page ug mas gipanindot pa gani ug nag-offer sa too good to be true nga prebelihiyo sama sa unlimited nga paggamit sa jetski nga kon sa tinuod mahal ang bayad niini kong inoras nga pag gamit.

Ang sinundog nga social media page mas nindot pa kuno ug mao pay mo-report ngadto ni Meta ug ang legit page mao nay ma flag o ma-restrict paita usahay mo-prevail na hinoon kadtong mga dautan. Bitaw subo palandongon nga mas nagka hightech na usab ang mga kawatan nga kong dili mabantayan daghan gyud ang ilang mabiktima. Sukad sa Septiyembre hangtud nining panahona miabot na sa 200 ka mga turista ang nabiktima niining mga hinampak.

Kadtong mga turista nga dili magmatngon magpataka lang og transact sa online aw segurado na gyud nga mohilak kamo inig abot didto. Ang sagad nahitabo mobayad nang daan ang mga turista kay lagi misalig man kay nagdagingot sanglit mas barato ug dili pud basta basta ang ilang offer unya ini’g abot sa Bantayan wala na diay silay kasak-an. Maayo kadtong daghan og kwarta kay chicken ra na pero kadtong binadget ang kwarta imbis malingaw, sobra pa sa mingaw ang bation kay dili naman malipay kay nabiktima naman.

Admitido ang mga law enforcers nga lisod sumpoon ang ingon niini nga modus kay dunay mga challenges nga masugatan ilabi na sa proseso sa pagkonektar sama sa meta o platform provider nga ini’g mo-request sila dili gani sila hatagan og bili. Ang katakos usab sa ilang kahimanan pag-trace sa mga scammer mora’g limitado man maong nanggara kining mga online scammer kay dili man sila madakpan.

Ang proteksiyon lang gyud nato niining maong modus mao ang pagmabinantayon kanunay dili mosalig sa mga tam-is nga saad. Kong kwarta na gani ayaw gyud isalig sa uban, mas maayong pangunayan, kong pwed nilawas ang transaksyon aron seguro nga malikay sa mga tawong nanginabuhi sa kangitngit nga nag-atang kong kanus-a sila makapamiktima.

Salig kita nga dunay padulngan ang gitinguha niining mga negosyante sa paglimpyo sa imahen sa dapit diin sila nanginabuhi ug labaw sa tanan wala nay maghilak nga turista tungod sa bati nga kasinatian.