Alas ni Lacson
Ang hapit molampos nga kudeta batok ni Senate President Tito Sotto nipakita sa publiko unsa kalisod ang trabaho ni Senate President Pro Tempore Ping Lacson. Sa padayon nga pagpangulo sa imbestigasyon sa Senate Blue Ribbon Committee sa P1.7 trilyones nga flood control scam.
Human gisaway sa kapakyas pag-imbestigar sa mga pasangil batok ni Presidente Ferdinand Marcos Jr. ug sa mga sakop sa gabinete, diriyot mapalagpot sa puwesto (kay siyay ikaduhang patiran kon natangtang pa si Sotto) tungod sa iyang pagrekomendar og kasong plunder batok sa iyang kaubanang mga senador.
* * *
Wala na kinahanglana ang rekomendasyon sa Senado. Kay abunda nang mga ebidensiya sa Ombudsman ug tanang mga timaan nagpakita nga ang sunod nga ikiha ug ipadakop sa Sandiganbayan mao na silang kanhi Senate President Chiz Escudero, kanhi Senate Presidente Pro Tempore Jinggoy Estrada ug kanhi Senate Majority Leader Joel Villanueva.
Pero dili mahimong isnabon ni Lacson ang mga testimoniya ug mga ebidensiya nga iyang nahipos batok sa tulo. Sa walay paghisgot nga ang isog nga rekomendasyon makasagang sa mga pagduda nga nanagana siya pag-imbestigar sa mga suod sa administrasyon.
* * *
Walay mapasabot ni Lacson nganong wala imbestigaha ang mga sinaligan sa presidente nga ginganlan sa iyang star witness (kanhi Department of Public Works and Highways Undersecretary Roberto Bernardo) nga nipalusot sa P100 bilyones nga insertion sa bicameral conference committee sa 2025 budget.
Wala niya ipatawag silang kanhi Budget Secretary Amenah Pangandaman ug kanhi Executive Secretary Lucas Bersamin. Nitambong unta sa iyang public hearing ang laing gipasanginlan nga si kanhi Education Undersecretary Trygve Olaivar pero lahi ang pangutana ni Lacson.
* * *
Kapasanginlan si Lacson nga isog lang batok sa mga kontra sa administrasyon. Kay iyang kauban sa majority bloc, Senador Mark Villar, nga gilambigit sab ni Bernardo sa kinawatay sa flood control projects, igo lang niyang girekomendar nga ipaubos og dugang imbestigasyon.
Sa timbang-timbang tingaling Lacson, dili hulga silang Escudero, Estrada ug Villanueva kay tua na man sa pikas. Mas dako ang risgo kon hilabtan ang kaubanan sa tandugon nilang mayoriya. Nganong pipila ra man nitulisok ni Lacson sa iyang lihay-lihay? Kay mapasaylo siya sa publiko aron lang dili makontrolar ang Senado sa mas kadudahan nga grupo.
* * *
- Latest
