Daghang gyud Magbagolbol niini

Naguol ko pagkasayod sa hukom sa Board of Directors sa Metro Cebu Water District (MCWD) nga pakubsan nila ang paliton nga tubig gikan sa ilang mga private suppliers. Masabtan baya nga ang katuyoan sa Board aron mokunhod ang ilang gasto, o bayranan ngadto sa mga water suppliers. Apan kining pagahimoon sa MCWD nga pakubsan nila ang kumprahon nga tubig, maisip na hinoon nga pakyas na sila pagtuman sa ilang tahas. Ang tahas sa MCWD mao ang pagtubag sa panginahanglan og tubig sa katawhan nga namuyo sa ilang franchise area, nga naglangkob sa Liloan, Compostela, Consolacion, Mandaue, Lapulapu, Cordova, Cebu City ug Talisay. Dili ikalimod nga nagkuwang man gani og supply nga tubig ang MCWD aron maserbisyohan nila ang tanan niini nga water subscribers. Daghan ang nagbagolbol nga ang ilang mga gripo usahay moagas, ug usahay dili. Tungod ni kay kuwang og suplay nga tubig ang MCWD.

Unya karon, ang bag-ong MCWD Board of Directors nga gipangulohan ni Ruben Almendras, mihukom na hinoon nga pakubsan ang gidaghanon sa tubig nga paliton nila gikan sa mga private supplier.

Ang resulta niini mahubsan na gyud hinuon ang gripo sa mga konsumedor, ilabi na kon moabot na ang El Niño. Gibanabana nako nga kon ang mga tawo nagreklamo man karon sa kanihit sa tubig, mosamot nga daghan ang magbagolbol karong sunod semana.

Midayeg ko ni Ruben Almendras kay business executive gyud ni siya, ug nahimo na kaniadto nga chairman sa MCWD, pero ambot og nahunahuna ba kini nila pag-ayo ang epekto sa ilang gihimo.

Dili nila mabasol kon ang katawhan mangasuko ug hinganlan sila og dili makamao mangita’g sulbad sa problema. Tinuod, daku-dako ang alkanse sa MCWD pero dunay rason nganong naingon niini.

Di ba kaniadto duna may Purchase Water Adjustment (PWA) nga kolektahon sa MCWD gikan sa mga water consumers? Wa na man kini karon kay gidid-an man sa Local Water Utilities Administration (LWUA) ang mga water district sa pagkolekta og PWA.

Lain pa, ang tubig sa MCWD nga gipalit gikan sa mga private water suppliers og tag P65 ngadto sa P80/cubic meter, kuhaon ra sa mga bombero nga libre kon dunay sunog. Pila kaha ka cubic meters nga tubig ang magamit sa mga bombero hangtud mapawong ang dakung sunog? Ang mga water tanker sa Cebu City Hall nga magkuha’g tubig kay ibisibis sa mga tanom nga anaa sa center islands sa karsada, ug sa mga barangay nga magkuha og tubig direkta gikan sa mga water hydrants daplin sa karsada, wa man na sila’y bayad. (Padayonon sa Martes)