Adlaw sa pagpaningil
Ambot tsamba ba lang. O mao nay sinugdanan sa bag-ong uso. Ang niaging Lunes nahimong adlaw sa pagpaningil dinhi sa Sugbo:
• Gisuspenso si Minglanilla Mayor Rajiv Enad tungod sa pasangil nga gihasi niyang mga negosyante nga nangahas pagsukol niya sa natad sa politika;
• Gisalikway sa Sandiganbayan ang mosyon ni kanhi Cebu City Mayor Mike Rama pagbasura sa kasong pagpangawkaw batok niya; ug
• Gikiha ni Cebu City Vice Mayor Tommy Osmeña atubangan sa Korte Suprema si Mayor Nestor Archival ug Rama aron mahunong ang pag-ilog sa dagkong mga negosyante sa Carbon.
* * *
Ambot naatol ba lang sab niadtong Lunes, o timaan na sa umaabot nga mas dagko nga politikanhong kaguliyang karong tuiga, pulos nag-atubang og impeachment complaints sa House of Representatives ang duha ka labing dagkong mga opisyal sa nasudnong gobiyerno:
• Gisugdan na sa House Committee on Justice ang paghusay sa duha ka impeachment complaints batok ni Presidente Ferdinand Marcos Jr.; ug
• Nagsunod sa pagsumiter ngadto sa upisina sa House Secretary-General, nagligas lang og kapin sa oras, ang duha sab ka impeachment complaints batok ni Bise Presidente Sara Duterte.
* * *
Niadto sang Lunes, gibasura sa Commission on Elections ang motion for reconsideration ni kanhi Mandaue City Mayor Jonas Cortes sa ilang pagkanselar sa iyang certificate of candidacy sa eleksiyon sa niaging tuig (nga posibleng makapasamot sa komplikasyon sa iyang election protest batok ni Mayor Jonkie Ouano nga gibasura na sab sa Comelec sa niaging semana).
Mahimong malutsan nilang Cortes, Archival, Rama, Enad, Marcos ug Duterte ang mga kaso batok nila. Pero silang tanan obligadong motubag sa mga pagpaningil batok nila.
* * *
Mas lanog ang pagpaningil sa mga Sugbuanon ni kanhi Gobernador Gwen Garcia niadtong Mayo 12. Wala siya motahud sa suspension order sa Ombudsman, nga na-inutil tungod sa iyang koneksiyon sa Malakanyang, pero gilubong sa mga botante og taga liog aron mapulihan ni Gobernador Pam Baricuatro. Napilde sab sa samang adlaw silang Cortes ug Rama.
Puno ang atong kasaysayan sa makauuwawng mga higayon nga ang katawhan gihikawan sa lehitimong katungod sa pagpaningil. Hinaot nga makakat-on sa leksiyon niadtong Lunes, ug niadtong Mayo 12, nga ang katawhan, dili ang abusado nilang mga sinuholan, maoy tinuod nga hawod.
* * *
- Latest
