Haros kamunggay ang mga opisyal sa Minglanilla

Gikan sa mayor, bise mayor hangtud na sa mga sakop sa konseho sa lungsod sa Minglanilla ang gipangsuspenso sa Ombudsman, gibinlan lang og duha, kadtong bag-ong mga milingkod sa katungdanan sa nakalabayng eleksyon. Usa ka tuig nga walay suweldo ang gipahamtangan nga silot sa mga opisyal. Gipahamtangan sila og silot tungod sa kasong gipasaka sa usa ka private entity nga naglakip sa grave abuse of authority, grave misconduct, opression ug ubang mga administrative cases.

Naggumikan kini sa pagbarug sa mga opisyal sa lungsod aron kapanalipdan matud pa ang mga molupyo sa sitio Napo Barangay Guindarohan diin nabutang sa peligro ang kinabuhi sa mga molupyo tungod sa gitinguhang proyekto sa private entity sa dapit. Dinhi na nagsugod ang tanan nga misangpot sa pagkasuspenso sa mga opisyal sa lungsod.

Gidawat sa mga respondents ang decision sa Ombudsman ug ang proseso niini, apan gipadayag nila nga mohimo gihapon sila og legal remedies kong aduna pay available nga ilang madangpan. Subay sa nahitabo otomatik ang number one councilor nga ang asawa sa mayor ang milingkod isip mayor acting in capacity ug ang laing miembro sa konseho ang acting vice mayor. Ang mahitabo duha lang ka mga opisyal ang maglihok sa lungsod samtang nagpadayon ang proseso nga gihimo sa Department of Interior and Local Govenrment aron mahan-ay ang tanan. Dili basta basta ug dili madali ang proseso kay dili man usab puwede laktoron ilabi na ang kamada sa Sanguniang Bayan gikan sa position sa bise mayor. Sa mga nabakanteng position sa mga konsehal, gikinahanglan nga ipaagi pa kini sa buhatan sa presidente ug ipaagi sa SILG, ug gikinahanglan pa ang nominasyon sa highest political party. Hinuon walay problema kay nagkahiusa ra man sila nga sakop sa usa ka partido nga gilihok na karon.

Gipasalig sa provincial director sa DILG nga sa labing daling panahon mahansay ang tanan aron dili maapektohan ang batakang serbisyo sa mga tawo sa naasoyng lungsod. Sa tinuod lang mora’g wala man kaayoy problema kay bisan nasuspenso si Mayor Enad ang nipuli niya ang iya mang asawa nga in fairness maayo man usab og agi bisan og bag-o lang sa katungdanan. Gawas pa mamahimo man gihapon mopaambit si suspended Mayor Enad sa iyang panahom sa pagpadagan sa lungsod kong gikinahanglan.

Sa nahitabo sa lungsod sa Minglanilla, nagpakita lang kini nga bisan og maayo ang intention alang sa kaayohan sa katawhan apan duna may balaod nga gikinahanglan sundon ug kadtong makasupak niini silotan. Walay labaw sa balaod bisan og ikaw ang labing gamhanan sa lungsod o sa nasud basta mapamatod-an nga adunay nahimong kalapasan sa balaod dili gyud mamahimong eskapohan.

Unsa man ang mamahimong epekto niini sa pagdumala sa mga local chief executives? Makabugnaw kaha kini sa paghimo sa alang kanila makaayo sa kinabag-an bisan og dunay moreklamo nga makaingon sa ilang kaalautan?

Usa ka tuig, medyo taas ra apan swerte lang ang lungsod sa Minglanilla kay nagkahiusa sila. Kay kong nahitabo pa nga dunay mga kontra, basin ang nahitabo kaniadto ni kanhi Mayor Mike Rama sa dakbayan sa Sugbo mao usab ang mahitabo sa Minglanilla. Ma-relax lang una sila pangandam sa mosunod nga eleksiyon.