Pagpamalandong sa Matag Domingo Bulahan

Maayong balita

Kasagaran kun maghisgot kita og bulahan ang musulod dayon sa atong hunahuna mao man nga daghang grasya (kasagaran materyal). Apan ang pagkabulahan dili lang nato sabton ingon nga kutob lang sa bisan unsang materyal.

Nabulahan kita tungod kay ang Dios ang nihatag kanato og pabor ug panalangin. Bulahan kita tungod kay ang panalangin sama sa kalinaw ang dili man kabayran og salapi. Ang value orientation ni Jesus dakong sukwahi sa value orientation sa sa kalibotan.

Kasinatian

Dunay panultihon nga nagkanayon: “Dili na karon panahon ni Kristo panahon na karon sa Alisto!” Matud pang Esteban Escudero managsama ra ta apan mas bintahan kun may kwarta ta!” Ang gitudlo sa kalibutan mao kining mosunod:

1.    Bahandi bisan pa man kun masakripisyo ang relasyon.

2.    Gahum bisan pa man kun makatunob sa katungod sa uban.

3.    Kasikat bisan pa man kun nagpasabot usab kini og kontrebersiya.

Apan lahi kang Kristo Jesus iyang gipatigbabaw nga ang tinud-anay nga kadato wala diha sa bisan unsa nga nahuptan nato.

Ang kalinaw mas mahinungdanon kaysa kagahob. Mas mahinungdanon ang pagpaubos kaysa pagpataas. Kini tungod kay sa abog kita gikan ug sa abog kita pauli.

Lihok

Karong Semanaha himoa ang pag-imbentaryo sa mga kasinatian diin anaa natataw mo ang panalangin nga gikan sa Dios alang kanimo.

 Alang kanimo bulahan ka ba sa gihapon? Unsay nakapahimo nimong bulahan?

Pangamuyo

Ginoo anaa kami sa kalibutan apan tinguha namo nga mamahimong bulahan pinaagi sa pagsunod sa imong panig-ingnan.

Ang kakabus nga maoy magdapit kanamo sa pagsalig sa imong pag-amoma. Ang kaubos nga maoy mopanton sa among kamapahitas-on ug ang pagkamaluluy-on nga mobutog sa mapintasong kalibutan.

Ikaw nga buhi ug hari hangtud sa kahangturan. Amen.