Kanunay nga "Daug"

Nangangkon ang self-proclaimed psychic nga si Rudy Baldwin nga tungod sa iyang abilidad nga makakita sa umaabot nga panghitabo, kanunay siyang makadaug sa lotto.  Ang nakaparat lang kuno kay wala niya ma-claim ang duha ka major prizes (balor og P25 million ug P49 million) nga iyang nadaug kay gikuha kuno ang winning ticket gikan kaniya ug wala kini niya mabawi kay wala man kini niya mapirmahi.  Nikalit man ka-aslom ang dagan sa estorya kay medyo sukwahi man kini sa natural nga kina-iya sa tawo. Makapahinumdum sa usa ka lalaki nga labihan gyud ka swerte, kay kon motaya siya sa swetres, daug; kon motaya sa masyaw, daug; kon moapil sa raffles sa kapilya, daug gihapon.  Gani, hangtud sa iyang pagka-minyo, ‘DAUG’ lang siya gihapon (sa asawa).  Ateerr!

Kabus ang magbayad

Segun sa Philippine Statistics Authority (PSA), nakasinati ang ekomoniya sa Pilipinas og kagubot ug kaguliyang sa katapusang quarter sa tuig 2025, nga miresulta sa pagtbugsok niini tungod sa kuyanap nga eskandalo sa kurapsyon sa flood control projects tungod kay mikunhod man usab sa pagsalig sa mga konsumidor ug magpapatigayon. Ni’ng pagtibugsok sa ekonomiya, dayag nga moping-it usab pag-ayo ang katawhan tungod kay sila man ang labing apektado.  Husto ang giingon ni Pope Francis nga, “Ang kurapsyon pagabayran sa mga kabos.”  Muleeng!

Magpahubog-hubog na lang

Nakadangilag og online nga diskusyon ang Philippine looper nga si Ferdinand Dela Merced human siya magpost social media kabahin sa iyang kasagmuyo tungod kay wala siya atimana ug gipasagdan lang nga magutman atol sa usa ka parada ug concert event sa Bataraza, Palawan.    May pagka-feelingiro sad kini si Dela Merced kay moreklamo man dayon kon dili siya matagad sa lugar nga iyang maagian.  Apan ato na lang sabton kay ginaingon man gud nga, “Ang maalam nga tawo usahay mapugos na lang nga magpahubog-hubog aron makakuyog ug magkasinabot siya ug ang mga hanggaw.” Madahaan!

Walay limit ang pagka-hanggaw

Alang kang Senate President Vicente Sotto III, ang impeachment case batok kang Bise Presidente Sara Duterte usa na lamang ka “impossible dream” human mohukom ang Korte Suprema nga ibasura na gyud sa hingpit ang maong kaso.  Nagtuo si Sotto nga nakahimo og “overreach” ang Korte Suprema sa mandato sa Kongreso pinaagi sa maong desisyon.  Kinsa ba gayod ang nakahimo og “overreach”: ang Korte Suprema nga awtoridad sa balaod o si Sotto nga mihubad sa balaod bisan dili siya abogado?  Mao kana’y giingon nga, “Ang kaalam sa tawo adunay kinutuban samtang ang iyang pagkahanggaw walay utlanan.” Fezteleern!

Medical mission

Adunay Medical Mission nga ipahigayon alang sa pag-opera niadtong adunay cataract ug pterygium sa mata nga pagahimoon diha sa Parokya sa Archdiocesan Shrine of the Immaculate Heart of Mary sa Minglanilla.  Ang screening/check up pagahimoon karong Pebrero 11, 2026, magasugod sa alas 8 ang takna sa buntag. Adunay obligasyon ang magpa-opera nga P3,500 alang sa tambal ug bayad sa lente.  Kadtong adunay gitumar nga Blood Thinner, kinahanglan nga mokunsulta daan sa ilang doktor pito (7) ka adlaw sa dili pa ang operasyon.  Aduna lama’y 600 ka slots nga mahimong ipaubos sa pagcheck-up.  Gihangyo usab ang tanan nga magbawon og tubig ug makaon.  Salamat!