EDITORYAL — Pinoy sa Russian Army?

Dunay nanggawas nga mga hulagway sa social media nga nagpakita og mga hulagway sa mga giingong usa ka Pilipinong napatay sa Donetsk Region didto sa nasud sa Ukraine.

Ang usa sa mga hulagway dunay lalaking nga mora og Pilipino nga nagsul-ob og uniporme sa Russian Army.

Matud pa sa post sa usa ka Ukrainian defense page, ang maong lalaki usa ka Pilipino nga ilang napatay didto sa maon rehiyon.

Nigawas kini sa social media niadtong Enero 26 nga nag-ingon nga ang maong lalaki naila ang sa pangalan nga “John Patrick” nga usa ka Filipino citizen. Gani dunay narekober kaniya nga cellphone.

Giingon nga sakop siya sa Russian Army 283rd Regiment sa dihang kini napatay kauban sa ubang mga Russians atol sa pag-atake sa Novoselivka village.  Bitbit niya ang armas, mga bala ug papel nga nakasuwat kun unsa siya nga unit ug pangalan sa iyang commander. Nabantayan sab nga dili siya makamaong moestorya og Russian.

Ang maong post nag-ingon nga ang Ukrainians Defense Intelligence nag-ingon nga basi sa nakuha nilang data sa cellphone niini kini nagpakitang usa lang ka semana kining niagi og training ug gipadala dayon sa frontline.  Apan nasamdan kini ug gibiyaan.

Tinuod man o dili, kinahanglan gyud susihon sa Armed Forces of the Philippines ang report tungod kay posibleng daghang mga Pilipinong nangandoy moasenso ang kinabuhi ang posibleng nabiktima gyud niini karon.

Kun mahinumdoman, dunay mga report nga ang Russia nigamit og nagkalain-laing pamaagi aron maka-recruit og mga langyaw nga motabang kanila sa gubat sa Ukraine.

Apan dili direkta ang recruitment, kondili ipaagi lamang kini sa ordinaryong hiring og trabahador didto sa ilang nasud.

Daghan sa mga gikan sa Asya ug sa South Asia sama sa Nepal, Bangladesh, Sri Lanka, India ug ingon man mga nasud sa Africa ug South America ang nailad niini.

Kay inig abot didto dili ang trabaho nilang gi-aplayan ang ilang padulngan kondili sa frontline sa giyera as Ukraine. Dinhi sa Pilipinas daghan ang gustong makatrabaho sa abroad tungod sa kalisod sa kinabuhi, dili imposible nga tinuod ang maong report.