Katilingbanong panaw

Gidamgo sa atong talahurong Arsobispo Alberto S. Uy nga magpanaw ang tanan padulong sa gitinguhang kahiusahan ingon nga simbahan.

Apan matud pa adunay paagi aron sa ingon mamahimong makab-ot kining maong tinguha. Kini maglangkob ning mosunod:

1. Ang mag-una sa panaw mao kadtong mga hamtong ug may kalam aron ang tanan makapanaw segun sa hustong tempo ug kapaspas.

Dili maayo nga mag-una ang mga lagsik sanglit mao unya kini ang hinungdan nga daghan ang mabiyaan.

2. Ang mosunod mao kadtong mga batan-on ug mga lig-on.

Sila kadtong manalipod sa mga edaran ug kanila nga mga nagsunod kun ugaling dunay mobanhig nga mga dautan.

3. Mosunod ang mga kababayen-an ug mga kabataan ug sila nga giisip nga mga vulnerables aron sa ingon anaa luyo sa mga kusgan ug manalipod kanila.

4. Sa katapusan mao kadtong mga manggugubat aron sa ingon sila makapanalipod sa kadaghanan kun ugaling dunay mga dautan nga anaa sa ilang luyo nga buot mohasmag ug mopahimulos sa kahuyangan sa kadaghanan.

Ang simbahan ingon nga katilingban ang kiinahanglang nga magmanggihunahunaon sa usag usa.

Kun ang matag usa dunay dakong kaikag nga manginlabot sa matag usa nan, mamahimong hapsay ang dagan sa tanan.

Ang panaw sa pagtuo nagkahulogan man ug debosyon nga magdala sa matag usa kanato ngadto sa pagkab-ot sa kausaban.