“The Most Silent City”

Mao kini ang gitinguha nga mahitabo sa dakbayan sa Sugbo nga gipahibawo ni Vice Mayor Tomas Osmeña atol sa pag atubang niya sa media niadtong nakalabayng semana.

Tungod niini gusto sa bise mayor nga 24 oras ipatuman sang anti noise ordinance sa syudad.

Mahitabo gyud kaha ni? Seguro kong panahon sa kagabhion dali ra kay naa namay ordinansa ilabina sa pag-videoke nga magbuntag. Pero panahon sa adlaw mora’g lisod man kay dili malikayan ang kasaba sa palibot ilabi na sa mga dagkong syudad.

Seryoso si Osmeña nga mapatuman kini apan gikinahanglan pa nga adunay public consultation mahitungod niini ug aron usab mabati kong unsa ang angayan nga himoon kay dili man pud mahimo nga wala nalay kasikas panahon sa adlawan.

Siguro pwede ra ang regulation dili ang total ban ilabi na sa nag unang kalingawan sa mga tawo ang pagkanta kanta bahala og mga dili maayo og tingog nga klaro kaayong noise pollution gyud.

Para nako nga gusto og hilom nga palibot pabor kaayo ko niining plano sa bise mayor kay malinawon kaayo atong pamati.

Gawas pa makaayo usab sa mga nanarbaho bisan unsang orasa kay dili man tanan makatulog sa gabii naa man usay adlawan ang tingkatulog kay shifting ang trabaho.

Apil sa masumpo mao ang kanang saba kaayo nga motor nga giusab ang tambutso aron gyud makapakita sa ilang hambug.

Maayo kaayong patiran kong moagi sa imong tungod kay sakit kaayo sa dunggan ang andar sa sakyanan. Aron masiguro nga mapatuman ang anti noise ordinance sulod sa 24 oras dili lang kadtong masakpan nga gasabasaba ang silotan kon dili apil ang mga enforcers sama sa tanang mga barangay officials, barangay tanod, mga police nga na-assign sa dapit, pamultahon sila og tag 500 pesos kada usa nga madakpan nga violator, gamay ra para sa uban.

Ang pangutana kinsa man ang manakop sa mga violators nga apil man ang makadakop silotan pastilan.

Kong disiplinado lang unta ang mga tawo kinsa makahibawo mohunahuna dili na kinahanglan nga adunay mga ordinansa sama niini.

Apan lagi kay gahi man og mga ulo maong gikinahanglan nga ipatuman ang balaod aron mapugos sa pagsunod ang mga tawo.

Basin maayo lang ni sa sinugdanan apan ini'g labay sa panahon mataligam-an na kay wala namay mopatuman. Daghan kaayong mga balaod nga walay kapuslanan sanglit walay klarong implementasyon, samtang ang mga tawo ang mga otoridad ra usab ang bantayan.

Sama nalang sa no-stopping sa karsada kong walay gabantay aw ang mga sakynanan diha na hinuon magparking kay maghuwat og pasahero, ang uban mo-uturn lang bisan og solid line diha pa gyud sa downtown area duna koy nasundan nga usa ka MPUJ nga ni-uturn dapit sa unitop pastilan.

Wala pa man petsa kanus-a ang public hearing sa 24 oras nga anti noise ordinance apan excited na ang uban nga uyonan sa kadaghanan aron masuwayan nato kong unsa gyud ang kasinatian kong makapuyo ta sa “The Most Silent City”.