Gi-harass sa giutangan nga online lending APP

Dear Atty. Divine,

Nangutang ko sa usa ka lending app nga akong nakita online. Ang akong giutang P25,000.00, ila kining gikuhaan og processing fee ug ang akong nadawat P22,000.00 payable kini for 6 months. Apan napakyas ko sa pagbayad sud sa duha ka buwan, ug nakurat nalang ko kay midako na man pag-ayo ang akong utang kay nagpatong-patong na ang interest niini. Sa dihang napalta ko sa pagbayad, sigehan nako nila og tawag, sige sila pangpanghadlok nako og nag send sila og mga messages sa akong mga kaila sa Facebook nga scammer daw ko. Na stress na ko pag-ayo tungod sa ilang gibuhat. Unsay angayan nako nga buhaton aron mahunong na ning ilang harassment?  Daghang salamat. — Charlene

Dear Charlene,

Daghang na gyung nagreklamo aning mga online lending app tungod sa ilang pagpang-harass sa mga utangan nga di makabayad nila. Usa ka kalapasan sa Article 282 (Grave Threats) under the Revised Penal Code og kalapasan sab sa SEC Memorandum Circular No. 18 or Unfair Collection Practices kining ilang gibuhat. Ang ilang pagpahamtang og taas nga interest ug way klarong sumada sa utang kalapasan sab kini sa Lending Company Regulation Act or Republic Act 9474. Busa, ang una nimong buhaton karon mao ang pag gather sa mga ebidensya, pag-screen shot sa ilang mga messages nga nang-harass kanimo ug mamahimo kang mopasaka og reklamo sa Securities and Exchange Commission kon SEC batok sa maong lending app. Mamahimo sab ikaw nga mopasaka og reklamo ngadto sa PNP or NBI tungod sa grave threat ug cyber harassment nga ilang gibuhat. Thank you and God Bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.