Atong basura
Dili makapanghunaw silang Cebu City Mayor Nestor Arhival ug Bise Mayor Tommy Osmeña sa problema sa basura. Si Osmeña ang mayor ug si Archival unang nagsugod pagka konsehal dihang gitukod ang Inayawan sanitary landfill sa 1995. Kabahin sila sa mga administrasyon nga nagpataka sa operasyon sa basurahan.
Mayor si Osmeña sa pagsugod sa operasyon sa Binaliw landfill sa 2017. Konsehal si Archival sa pagsugod og sulbong sa mga reklamo sa kahugawug kabaho sa 2019. Mahimong tulisukon ang ilang mga kaatbang. Pero apil sila sa mga responsable sa krisis sa basura.
* * *
Kon gipatuman pa lang nilang mga lagda, nga ang isulod sa landfill mao rang mga basura nga dili ma-compost (malata) ug ma-recycle (dili malata), wala unta malubong dayon sa bukid sa basura ang Inayawan.
Kon sama sa Bayawan City, Negros Oriental nga 20% ra sa basura ang nasulod sa landfill, duna pa untay bakante sa Inayawan ug dili unta magkara-kara ang Cebu City og pangita og kalabayan ug magpakiluoy sa kasilinganang mga syudad ug mga lungsod sa pagdawat sa iyang usa ka libo ka toneladang basura kada adlaw.
* * *
Kon gipaminaw pa lang nilang Osmeña ug Archival ang lehitimong mga protesta sa mga molupyo batok sa iresponsableng operasyon sa Binaliw, wala unta mangamatay ang 36 ka trabahante ug motumaw kining labing dakong labad sa ulo asa idam-ok ang nagbuntaog nga mga basura.
Dili masulbad ang problema pinaagi sa binasolay. Pero ang dako nilang tampo sa krisis hinaot nga makapa-kumbinser nilang Archival ug Osmeña sa dili na pagsubli sa karaan nilang mga pataka.
* * *
Kay dili man masigaan sa mata ang mga mayor sa probinsiya, dili tungod kay walay gustong motabang kon dili tungod sa nangalisbong track record sa Cebu City, angayng angkunon nilang Archival ug Osmeña ang responsibilidad paghipos sa atong kaugalingong basura.
Aron dili magkabulingit ang Cebu City, imbes modemanda og lahap nga sulbad sama sa pagsunog sa basura (pagtukod og waste to energy facility maabtan og katuigan), angayng mosunod sa malampugong landfill operations. Ibanan ang basura (50% ang malata ug kapuslan sa composting) ug i-recycle ang dili malata pinaagi sa pagtukod sa ilang gi-isnab nga materials recovery facility (MRF) sa kada barangay.
* * *
- Latest
