Dili motunong

Ang mga ginikanan nahigugma gyud sa ilang mga anak.

Kini tungod kay ang anak nga mohimo og performance bisan pa man kun diha sa pagsayaw o dili ba kaha sa pagkanta, dili isyu kun yabag ba siya o dili.

Nindot gihapon siya sud-ongon diha sa panan-aw sa usa ka ginikanan.

Bisan pa man kun kini ang sitwasyon apan alang sa usa ka ginikanan mahinungdanon ang bili sa bata kaysa iyang mahimo.

Apan subo palandungon nga daghan gihapong mga ginikanan ang nahimong dili maantigong mosaulog sa bisan unsa nga nahuptan sa ilang mga anak.

Gani ang ilang mga anak ila mang itandi ngadto sa ubang mga anak sa laing tawo.

Butang nga ikasakit sa bata nga moresulta og pagrebelde niini.

Sa laing bahin sa akong pagtagik ning maong lindog nabalita sa kahanginan nga dunay bag-ong gipakatawo nga bata ang gibilin lamang dapit sa may Redemptorist Church. Nagkadugo pa ni.

Timaan nga bag-o pa kini gipahimugso. Wala ta masayud sa hinungdan o rason sa inahan niini apan subo palandungon nga ang inahan makaako sa paghimo sa ingon.

Sinugdanan pa lang gani, anaa na ang gitawag og rejection.

Trauma nga pagadad-on niya hangtud na sa iyang pagdako.

Ang mga Kabataan atong kaugmaon. Kun unsa sila ugma mao kini ang mosalamin kun unsa kita karon.

Ato unta silang imatuto uban ang gugma ug paghangop.