Bagsakan sa mga kinawat nga cellphone

Napuhag sa kapolisan sa dakbayan sa Sugbo ang bagsakanan sa mga kinawat nga cellphone sa Sugbo nga nahimutang sa usa ka cellphone shop sa dalan Leon Kilat diin nasakmit ang tulo ka backpack nga puno sa cellphone ang ilang nakuha sa sulod sa kwarto nga gibangan sa ibabaw nga bahin sa cellshop. Gipahigayon ang operasyon sa kapolisan niadtong Enero 20 human makadawat sila og impormasyon nga naa sa dapit ang nahimutangan sa mga gadget.

Nahimong yawe nila ang usa ka babayeng tinun-an nga nakawatan og cellphone niadtong Sinulog Festival kinsa namonitor niya ang cellphone location pinaagi sa special sa iPhone ug positibo nga toa sa dapit ang iyang cellphone nga nagpaila lang nga mga kinawat gyud ang mga butang nabawi sa mga otoridad. Pilian diay kaayo ang mga kawatan kay pulos mahalon man nga brand ang gipanguha nila diin 95% mga bag-ong model sa iPhone.

Kasagaran sa mga nakawat nga cellphone nahitabo sa panahon sa Sinulog. Hinuon dili sa Sinulog route kay aduna may daghang mga pulis nga nagbantay ug didto mi-operate ang mga kawatan sa mga dapit nga daghang mga tawo nga kasagaran nangalipat na sa tumang kalipay tungod sa selebrasyon. Duna usay mga nakuha nga mga cellphone nga bisan wala pa ang Sinulog. Unang higayon kini nga hilabihan ka daghan sa mga cellphone ang malampuson nga nabawi sa mga sakop sa PNP nga miabot gyud sa 154 ka mga units daghan na usab niini ang nailhan na sa mga tag-iya. Hinuon wala pa ma-release dayon kay ipaagi man sa proseso sanglit mga ebidensiya man kini sa ipasaka nga kaso batok sa mga nalambigit sa pagpangawat sa ilang mga butang apan gipaneguro sa CCPO nga makuha ra nila sa higayon mahuman sa pagproseso. Dunay duha nga nadakpan atol sa operasyon ug apil usab ang tag-iya sa tinahan ang gipaubos sa imbistigasyon nga angayan lang usab tungod kay klaro man kaayo siyang naay nahimong kalapasan sa anti-fencing law kay siya man ang namalit niining mga kinawat nga butang. Nasayran sa kapolisan nga paliton lang sa negosyante og tag singko mil pesos ang mahalon nga latest model nga iPhone, take it or leave it, ang mga kawatan nga kapit sa patalim mosugot usab dayon bisan pa seguro og usa ka libo mosugot na.

Matud ni Col. George Ylanan, ang OIC sa Cebu City Police Office, nga mando niya sa mga sakop ilabi na atol sa Sinulog nga sumpoon ang tanang matang sa krimen apan kon dili gyud madala ug malutsan seguradohon nga masolbad usab dayon 100% nga maoy nahitabo karon nga nalutsan sa mga kawatan apan nabawi ra usab dayon ang mga butang nga kinawat.

Maayo unta kong madakpan tanan ang mga nalambigit og madugta sa bilanggoan aron dili makapangawat inig gawas niini sa bilanggoan, pero makapyansa ra man gihapon ni sila ug mobalik ra usab sa ilang kadautan. Kong mahimo pa lang pamutlan ni sila og kamot kang pinapook gyud aron dili na kapanguot. Ang kalamposan sa pagpakigbatok niining maong krimen pinaagi usab sa koordinasyon sa katawhan apil na ang mga barangay ug ang kapolisan. Kong magtambayayong lang diay dali ra masulbad ang problema niining mga sagbot sa katilingban. Angayan dayon ang mga pulis niining dakong kalamposan nga ilang nahimo, bag-o pa lang nilingkod sa katungdanan si Col. Ylanan nilabok man dayon.