Gamhanan gyud si Santo Niño

Hilabihan gyud ka gamhanan ni Señor Santo Niño kay nagsingabot baya unta ang Bagyong Ada ug dinhi gyud sa siyudad sa Cebu ang puntariya, ug gikabalak-an nga apektado ang mga kalihokan sa Piyesta Señor, apan giliwag niini ang puntariya bagyo ug didto ra miigo sa northern Cebu.

Way uwan ug ang pagpahigayon sa fluvial ug solemn procession kaniadtong Sabado, wa gyud mabalda, ilabi na ang Sinulog Grand Parade sa miaging Domingo. Mas nindot pa gani ang panahon kay dili kaayo init, ug wa kaayo masakripisyo ang crowd control personnel ug ang nangapil.

Samtang dunay pipila ka tawo, nga klaro kaayong mga sakop sa laing relihiyon nga nanaway sa mga Katoliko, apan angay’ng ikauwaw nila kay ilang nakita nga naglawod ang katawhan nga miyukbo ni Señor Santo Niño.

Dunay uban nga mikwestyon ngano kuno nga pwerte nako nga pagdayeg kang Santo Niño. Ang ako lang ikasulti mao nga dili nako usikan ang bililhon nakong oras sa pakiglantugi sa mga tawo nga para nako way bili ang baruganan.

Padayona kon unsay imong gibarugan nga pagtoo, ug ayaw lang panghilabot sa uban.

* * *

Sayo ra nga nahuman ang Sinulog Grand Parade kaniadtong Domingo, apan angkonon nako nga mora’g napul-an na man ko pagtan-aw sa mga ingon niini nga kalihokan. Ang prosesyon ra ang gihatagan nako og pagtagad.

Sayonan ka nga sukad pa sa pagsugod sa Sinulog kaniadtong 1980 nga gamay pa kaayo ang manayaw, mga tinun-an pa lang sa mga tunghaan, motan-aw na ko.

Misamot na dihang apil na ko nga mohimo og radio coverage sa mga Sinulog dance competition pagka reporter na nako niadtong 1984. Gikan niining maong tuig hangtud karon, napul-an nako.

Para nako, pwerteng samoka na karon kay maglisud ka na pagtan-aw, ug dili na gani sayon ang pagpaduol sa karsada nga aron ka makakita sa sayaw tungod sa kadaghang tawo.

Kaniadtong Domingo, igo na lang ko mitan-aw og kadiyot sa sayaw sa pipila ka contingents didto sa General Maxilom Avenue, ug miadto na ko sa Sitio Kaimito, Barangay Lorega-San Miguel kay giimbitar man ko sa piyesta.

Pag-uli nako mga 6, human na ang Sinulog parade, ug nanglakaw na ang mga dancers pauli, ug ang mga tawo didto na paingon sa Ayala aron motan-aw sa fireworks.

Sigurado ko nga si Mayor Nestor Archival ug ang kadagkoan sa Sinulog Foundation Inc. mangita pa og mga paagi aron nga sa sunod Sinulog 2027, mosamot nga hapsay ug dili langay ang pagpahigayon sa kalihokan.