Trahedya sa pangiyugpos
Mayo 2019. Tungod sa grabeng kahugaw ug kabaho sa basurahan sa Binaliw, nagbarikada nang mga molupyo sa Binaliw sa ganghaan sa landfill. Nipasaka sila og pormal nga reklamo ngadto sa Environmental Management Bureau (EMB) sa Department of Environment and Natural Resources (DENR). Pero wala sila paminawa.
Nidangop sila sa barangay. Nidapig nila ang mga konsehal nga nipasar og resolusyon nga nag-awhag pagpasira sa basurahan. Pero giyak-an sa kapitan. Nagpalaban sila sa Cebu City Council. Gipaminaw sila pero nagpadayon ang kalang-og sa ilang palibot.
* * *
Septiyembre 2020. Niawhag ang Cebu City Council ni anhing Mayor Edgar Labella sa pagsira sa basurahan human sa privilege speech sa ilang presiding officer nga si kanhi Bise Mayor Mike Rama. Nipasidaan ang mga konsehal sa kaseryuso sa hulga sa kahimsog sa mga molupyo kon magpadayon ang operasyon.
Pero giyak-an ni Labella ang resolusyon. Dihang na-mayor na si Rama tungod sa kamatayon ni Labella sa 2021, bisan naa na unta sa posisyon sa pagpatuman sa iyang kaugalingong rekomendasyon, nibalitok si Rama ug bisan sa nagkagrabeng kahugaw ug kabaho nitugot sa padayong operasyon sa basurahan.
* * *
Oktubre 2024. Dihang nasuspenso ug dayon nataktak si Rama, si kanhi Mayor Raymond Garcia nipasalig nga aksiyonan sa labing daling panahon ang lehitimong mga reklamo sa taga Binaliw ug kasilinganang mga barangay nga nahugaw nang ilang mga tinubdan sa tubig.
Tuod man, nagpahimo dayon si Garcia og gatosan ka standees nga iyang gipabutang sa tanang lugar sa City Hall, Cebu City Medical Center (CCMC) ug tanang buildings nga gipanag-iya sa syudad. Wala maibani ang mga langaw nga nanghasi sa taga Binaliw.
* * *
Hunyo 2025. Nahinangop ang mga Sugbuanon sa pagdaog nilang Mayor Nestor Archival ug Bise Mayor Tommy Osmeña. Kay nagpatuong environmentalist si Archival, gilaoman siyang maoy mokurihir sa kasaypanan sa tulo ka mayor nga iyang gisundan.
Unom ka buwan na sa puwesto, wala hatagi og importansiya nilang Archival ug Osmeña ang problema. Maong ilang pamunoan ang naatlan sa trahedya sa paghagsa sa 20 ka andana nang bukid sa basura nga gikabalak-an nakapatay og kapin sa 30 ka mga trabahante. Kadako sa kadaot sa pito ka tuig nga pagpangiyugpos.
* * *
- Latest
