Diha sa atong mga kamingawan

Kining magka edaran na kita, daw hilig na kita nga moadto sa atong tagsa-tagsa ka mga kamingawan. Apan niadtong mga batan-on pa kita, daw malisud alang kanato nga magpamingaw o malisang kita sa hilom ug mamingaw nga kahimtang. Adunay daghang mga rason kun ngano.

Kini mahimong maglangkob ning mosunod:

1. Sa panahon sa atong kabatan-on lingaw pa kaayo ang atong kaugalingon sa kagahob. Daghan pa kaayo kita og buot kab-oton. Daghan pa kaayo kitang buot pamatud-an ug barugan. Ang entablado sa kalibutan buot natong apilan ug daghan nato ang buot mamahimong bida sa bisan unsang matang sa pasundayag.

2. Malisang kita sa kamingaw ug kahilom. Kini tungod kay diha sa kahilom ug kamingaw MAKITA nato ang atong kaugalingon. Dili lang ang atong kaugalingon kondili ang masakit nga kamatuoran usahay sa atong kaugalingon. Butang nga lisang kaayo kita nga moatubang niini.

3. Diha sa talisalop nga bahin sa atong panaw sa kinabuhi angayan lamang nga kita mopahiluna diha sa kahilom ug mamahimong higala sa kamingaw kini aron kolektahon ug langkobon ang kinabuhi nga gipanaw. Ning paagiha mamahimo untang hinog ug hamtong ang atong pagsabot sa kinabuhi ug sa mga pagtulon-an niini.

4. Angkunon nato nga wala kitay mahakgom sa katapusan. Ang atong palad walay makuptan sa kaulahian. Apan bisan pa man niini ato kining bukharon atubangan sa Dios dungan ang pagpangayo sa iyang kalooy, ang bugtong dalangpanan ug paglaum natong tanan. Sa kaulahian wala na kitay angayang pamatud-an. Wala na gyud.