Tumba si Villa
Dihang naluya na og pinaabot ang mga Sugboanon kanus-a makiha ang mga kongresista ug mga opisyal sa Department of Public Works and Highways (DPWH) ug kakonsabong mga kontraktor sa Sugbo, kay ang gisaad nga pagpasaka og mga kaso karong buwana nahulga sa pagkabungkag sa Independent Commission for Infrastructure (ICI), nasabligan og tubig ang nagkaawop nang paglaom nga dunay mapriso sa kinawatay sa kapin sa P50 bilyones nga balor sa flood control projects sa niaging 10 ka tuig, nga gihulagway ni DPWH Secretary Dizon nga walay kapuslanan human gibanlas sa bagyong Tino.
* * *
Girelibohan ni Dizon ang labing dakong opisyal sa DPWH sa Sugbo ug Bohol nga si Regional Director Danilo Villa Jr. Wala siyay gihatag nga detalye unsay atraso ni Villa. Igo lang niingon si Dizon nga kabahin kini sa paglimpiyo sa DPWH.
Si Villa unang gipasanginlan nga dunay “lavish lifestyle.” Usa siya sa gipangayoan ni Dizon og og katin-awan sa mga pasangil nga ang iyang katigayonan nilapas sa iyang lehitimong kita. Wala say detalye nga gihatag si Dizon ngadto sa publiko unsay nadawat niyang kasayuran batok ni Villa.
* * *
Human naluwatan ang show cause order batok ni Villa sa Septiyembre sa niaging tuig, o upat ka buwan nang nilabay, wala na maghisgot si Dizon sa kontrobersiya. Mahigalaon silang nagkuyog kada duaw ni Dizon sa Sugbo, apil nang pagkuyog nilang Presidente Ferdinand Marcos Jr. human sa linog sa amihanang Sugbo ug sa bagyong Tino.
Nitumaw na ganing mga huhungihong nga natagbaw si Dizon sa katin-awan ni Villa maong wala matandog sa puwesto. Hangtod gahapon.
* * *
Karong narelibohan na si Villa, hinaot mapasabot ni Dizon sa mga Sugboanon duna bay nakit-ang sukaranan sa mosunod nga mga pasangil:
• Nga si Villa nakapalit og mahalong balay sa luhong subdivision diin makig-mahjong siya sa mga kontraktor (nga kanunayng nagpa-pilde) sa minimum nga pusta nga P400,000;
• Nga si Villa batabata ni kanhi Kongresista Zaldy Co ug maoy nagpalusot sa iyang budget insertions sa tibuok Central Visayas; ug
• Nga si Villa ang responsable nga kinadaghanan og flood control projects ang ikapitong distrito sa Sugbo kay didto madestino human gipalayas sa Bicol ug kansang kanhi kongresista, Peter John Calderon, iyang maninoy sa kasal.
* * *
- Latest
