Imee dili kahadlokan
Dili makiangayon ang mga pasangil nga nahadlok ang kaparian sa Basilica Minore del Sto. Niño de Cebu ni Senador Imee Marcos tungod sa bangis nga kamatayon ni Archimedes Trajano niadtong si Imee pay nasudnong pangulo sa kanhi Kabataang Barangay (Sangguniang Kabataan na karon) sa 1977.
Bisan nakonbikto si Imee sa kasong sibil nga gipasaka sa mga ginikanan ni Trajano sa korte sa Honolulu, Hawaii (diin nagpuyo ang mga Marcos human gipalayas sa Malakanyang sa 1986), wala na siya sa posisyon pagpahilom sa mga nisukwahi niya atol sa bangis nilang diktadura.
* * *
Kon wala mahadlok ang kaparian, nganong gitugotan man nila si Imee nga nakasulod sa Basilica bisan nakalapas sa ilang dress code batok sa mga manimbahay nga nag-sleeveless? Gani, nagpaletrato pa uban ni Imee ang mga madre ug ubang mga tagduma sa kalihokan sa taliabot nga Piyesta Senyor.
Naikog ba lang sila sa maguwang ni Presidente Ferdinand Marcos Jr.? O ang tinuod nga gipahamtangan sa ilang dress code mao ra gyod ang ordinaryong mga deboto nga walay ikasukol nila, dili ang labing dagko ug gamhanan nga mga opisyal sa gobyerno?
* * *
Nanagana ba nga kon gibadlong o gisaway nilang kalapasan ni Imee, nga wala mabantos sa iyang kamapasayluon, peligrong bawosan sila? Pero kon wala silay lang-og nga mga sekreto unsa may mahimo ni Imee batok nila?
Dili makapapasar og balaudnon si Imee nga mobuhis nila kay isip inilang mga sakop sa Simbahang Katoliko gipanalipdan sila sa 1987 Constitution. Samang wala silay angayng kahadlokan kon mangayo og kuwentada si Imee sa minilyon ka pesos nilang koleksiyon.
* * *
Maong wala gyoy rason nganong ang press statement sa kaparian parte sa kontrobersiya wala maghisgot ni Imee ug sa iyang kalapasan. Igo lang hinuon gipahinumdoman ang mga deboto nga padayon ang istriktong pagpatuman sa dress code.
Pasayloa ang kabos nakong pagsabot pero mora hinuon og ilang gibasol, imbes sabton, ang mga nanaway ni Imee ug mga nanawag sa ilang atensiyon sa kapakyas pagbadlong sa kalapasan. Sama rang niingon nga kon ang mga deboto nitingob pa lang sa pagbalaan ni Sr. Sto. Niño wala unta sila makakita ug dili unta mahasol nga dunay mga tawo nga wala motuman sa lagda.
* * *
- Latest
