Di sayop ang dress code

Dili sayop ang pagpatuman og dress code sa simbahan sama sa gihimo sa kaparian sa Basilica del Santo Niño. Ang sayop mao ang dili patas nila nga pagpatuman niini.

Dihang gipahibawo sa mga pari nga Agustino ang pagpatuman og dress code alang sa mga deboto nga mosulod sa Basilica, usa ko sa mga mipadayag og suporta niini taliwa sa daghang mga nagbagulbol. Ang akong rason simple---kun makahimo ta pagsul-ob og tarong nga bisti kun mangombira way rason nga dili ta makailis og disente nga sapot kun moatubang sa Ginoo diha sa pagsimba. Kun postorawo ka og mamisita, way rason nga mag-shorts ug magtsenelas kun mosulod sa simbahan.

Ug alang sa mga babaye dili gyud maayo nga magsul-ob og mga sapot nga makabalda sa mga mata sa mga mosimba sama sa mugbo nga sayal ug uban nga matang sa sapot nga law-ay tan-awon.

Apan lahi na ang sitwasyon kun dili patas ang pagpatuman sa maong lagda.

Ug mao ni nahitabo sa Basilica del Santo Niño dihang miduaw si Senador Imee Marcos niadto Sabado aron managkot.

Samtang daghan sa mga deboto nga gikan pa intawn sa kalungsoran ang gibalibaran nga makasulod sa ganghaan sa Basilica tungod kay wala masubay sa dress code ang ilang gisul-ob, yano rang nakasulod si Imee nga nag-sleeveless. Way bisan usa ka gwardiya ug pari nga Agustino ang mibadlong niya.

Dihang nag-viral ang litrato ni Imee nga nakalapas sa dress code, inay tubagon ug ipasabot unsay nahitabo sa pagpatuman sa ilang lagda, ang tigpamaba sa Basilica nga si Fr. Jules Van Almerez mipagawas og labihan ka simang nga pamahayag.

Segun niya nga ang Basilica kuno usa ka simbahan nga si bisan kinsa welcome nga mobisita sa way pagpinig bisan unsay kahimtang niini sa kinabuhi. Nanawagan pa siya og unity pagrespito sa tradisyon sa kapistahan sa Santo Niño.

Kun tinuod nga welcome ang tanang mobisita sa way pagtan-aw unsa ug kinsa sila, nganong ang ubang wa mailhi nga mga deboto inyong gibabagan nga makasulod tungod kay nilapas sa dress code samtang si Imee milahoy sa way panagana?

Haum ang pamahayag sa kanhi editor sa The Freeman nga karon usa na sab ka pari—si Fr. Ritchie Salgado--- angayang pahinumduman si Fr. Almerez ug ang kaparian sa Basilica nga usa ka dakong sala ang pagpamakak labi pa kun silang mga pari ang mohimo niini.