New sa bag-ong Tuig

Nahimong naandan natong mga tawo nga mangandam gyud sa bag-ong tuig. Ang uban mohimo pa gyud sa mga patuo-tuo (Pagtuo nga wala makasukad sa rason).

Daghan ang nagpaabot aron mosud-ong sa mga fire works display. Samtang ang uban buot mosugat niini diha sa talad kan-anan uban ang nagkadaiyang mga lamiang mga pagkaon.

Ang uban mosul-ob pa og mga polka dots nga bistida kay lagi aron swertehon sa bag-ong tuig.

Apan tugoti ko nga akong gamiton ang pulong: “NEW” kun bag-o sa atong pinulongan, ingon nga ACRONYM. Ang pulong N nagpasabot man og Nourishment dili lang sa atong lawasnong panginahanglan kondili usab sa atong Espirituhanong Kahimtang.

Dili paigo ang pagkaon ug pag-inom nga makatabang dako uyamot sa atong kahimsog. Hinunoa, atong himoong himsog usab ang atong kalag pinaagi sa mga sakramento.

Ang E nagpasabot man og Empowerment sa atong kaugalingon diha sa pagtuo nga bisan kun unsay mahitabo ang Dios andam gyud sa pakig-unong kanato.

Mas maayo kini kaysa iangkla nato ang atong kaugalingon diha sa mga prosperity bowls ug uban pang mga patuo tuo kalabot sa bag-ong tuig. Ang kinabuhi dili magic.

Ang kinabuhi usa man ka panaw ubos sa landong sa pagbantay sa atong Ginoo.

Ang W nagpasabot man og Wonder. Nindot nga ma amaze kita sa atong palibot ug nindot nga anaa ang sense of excitement sa matag gutlo sa atong kinabuhi. Sama sa usa ka bata nga bation og kalipay bisan pa man kun unsa ka yano ang gasa nga iyang nadawat.

Kita pud unta mamahimong kontento ug malipayon sa atong mga nadawat niadtong tuig 2025 hangtud karon sa 2026.  Happy NEW Year mga Igsuon!