Legal ba?

Ania na kita sa 2026 ug malipayong bag-ong tuig. Apan mora’g dili maayo nga tilimad-on ang mga panghitabo sa kalibotan karong panahona, niining unang mga adlaw sa pag-arangkada sa bag-ong tuig.

Sa niaging Sabado, nakugang ang kalibotan sa dihang giatake sa Estados Unidos ang Venezuela ug gisignit sa armadong  puwersa sa Amerika ang diktador nga presidente niini nga si Nicolas Maduro.

Nag-atubang og daghang kaso si Maduro sa Estados Unidos. Usa na niini ang giingong pagkalambigit ni Maduro sa ilegal nga druga. Gani matud ni US President Donald Trump nga ang Venezuela usa sa agianan sa druga gjkan sa South America padulong sa Estados Unidos.

Matud pa ni Trump, adto sa Amerika itaral si Maduro sa mga kaso nga giatubang niini. Ug kasamtangan nga gibilanggo si Maduro sa prisohan sa New York diin natanggong usab ang ilado nga mga celebrities.

Niining maong kalamboan, dakong pangutana ang nagsirkular karon. Nga legal ba ang pag-atake sa Amerika sa Venezuela ug pagdakop sa presidente niini. Dili ba ang Venezuela usa ka independent nga nasud?

Daghan gayud ang moribenta ug mosiyagit nga ilegal ang gibuhat sa Estados Unidos. Ilalum sa charter sa United Nations, dili makapanghilabot ang usa ka nasud sa internal affairs sa laing nasud.

Apan gumikan lagi sa diktatoryal nga pamunoan ni Maduro nga maoy hinungdan sa pagkalugmok sa ekonomiya sa Venezuela, daghan usab ang misuporta sa militarinhong aksiyon sa Estados Unidos.

Sa mata sa kalibotan, lisod i-justify ang mando ni Trump pag-atake Venezuela nga usa ka independent country. Apan sa mata sa katawhan sa maong nasud nga hagbay rang nag-antos ilalum sa pamunoan ni Maduro, ang lakang sa Amerika maoy sinugdanan sa ilang paggakos sa kagawasan.