“Invasion” sa Amerika

Bisan asa nga angulo nimo tan-awon labihan gyud ka kwestiyonable sa gihimo sa Amerika nga pag-atake ug pagdakop sa Presidente sa Venezuela nga si Nicolas Maduro ug sa asawa niini niadtong milabay’ng kadlawon.

Ang mga eksperto sa international law nagkauyon nga kalapasan ang gihimo ni US President Donald Trump tungod kay hugot nga gidili sa international law ug sa United Nations (UN) Charter ang paggamit og pwersa sa usa ka nasud ngadto sa laing nasud.

Ang gihimo ni Trump way pagtugot sa Kongreso sa America ug labaw na nga way approval gikan sa UN Security Council.

Ang Constitution sa America hugot nga nagmando nga gikinahanglan ang Congressional authorization sa dili pa mosulod og gubat ang ilang nasud.

Ang gihimo ni Trump mahulagway nga “Invasion” kon pagpanakop sa Amerika ngadto sa Venezuela, usa ka lakang nga way luna sa usa ka moderno ug civilized nga kalibutan.

Kwestiyonable ang pangatarungan ni Trump nga usa ka “law enforcement” operation ang ilang gihimo tungod kay si Maduro nag-atubang og daghang pasangil sa krimin didto sa Amerika sama sa pagpayuhot og illegal nga drugas.

Nabisto ang tinuod nga motibo ni Trump sa iya mismong pamahayag human ilang operasyon didto sa Venezuela dihang iyang gipahibawo nga plano sa Amerika nga i-take over ang control sa lapad nga oil supply sa maong nasud ug motudlo siya og mga tawon nga kasaligan aron maoy kasamtangan nga modumala sa Venezuela samtang gipahiluna pa ang transition alang sa bag-ong pamunoan sa maong nasud.

Ang Venezuela usa ka soverign nga nasud nga dunay kaugalingong pangobyerno. Way katungod ang Amerika nga manghilabot unsaon pagpadagan sa mga tawo sa Venezuela ang ilang gobyerno.

Labaw na nga way gahom ang Amerika nga magbuot unsaon sa Venezuela paggamit ang ilang natural resources sama sa oil.

Sa pamahayag ni Trump tataw nga ang tumong ug tuyo sa ilang pagpangatake mao ang pagpangilog sa oil reserve sa Venezuela ug pag-panghilabot sa ilang gobyerno.

Sukad pa niadtong 2013 dihang milingkod si Maduro sa katungdanan hulip sa kanhi lider nga si Hugo Chavez wala na moila ang Amerika sa iyang gobyerno.

Gipasanginlan siyang midaog tungod kay gitikas niini ang piniliay niadtong 2018 ug 2024.