Hapon nilugos sa menor de edad

CEBU, Philippines — Usa ka Hapon ang gidakop human kini gireklamong mi-kidnap ug milugos sa iyang menor de edad nga uyab sulod sa usa ka condominium sa Barangay Mabolo, Cebu City niadtong Lunes, December 29.

Giila sa Cebu City Police Office (CCPO) ang suspek nga mao si Natsuki Sasahara, 19, lumad nga taga Tokyo, Japan ug kasamtangang nag-abang og usa ka condominium unit sa maong barangay.

Ang biktima 17-anyos nga taga Mandaue City.  Si Police Major Eric Gingoyon, hepe sa Mabolo Police Station 4 miingon nga nagkaila ang duha pinaagi sa online dating platform ug human sa kapin usa ka bulan nilang pagsige og chat nagkasabot silang personal nga magkita.

Naabot dinhi ang suspek isip usa ka turista sa miaging semana nga ang tumong mao ang pakigkita sa biktima. Alas 9 sa gabii niadtong Lunes, December 28 giimbitar niini ang biktima diha sa iyang condo unit.

Apan dihang mouli na kay pangitaon siya sa iyang ginikanan, gikatahong dili mosugot ang suspek. Diha na nahitabo ang matud pa pagpanglugos. Ang ginikanan sa biktima nakahibalo ng daan kun asa niadto ang anak maong nianang alas-4 sa kadlawon giapas nila kini ug diha siya gitug-anan sa anak sa gibuhat sa suspek hinungdan nga iyahang gidakop ang maong Hapon ug midangop sila sa Mabolo Police Station 4.  “Nireklamo ang minor, base pod sa nakuha namo nga information, okay ra unta daw sa parents pero ang condition is iyang minyoan unya murag nibalibad man ang Japanese,” matud pang Gingoyon.

Nagpaabot pa ang kapolisan sa resulta sa medical examination sa biktima. Walay gihatag nga pamahayag ang suspek samtang nakig-alayon na sila sa embahada sa Japan. IBM BANAT NEWS