EDITORYAL — Independent People’s Commission

Tungod aning nadiskubrehang hayag pa sa buwan nga kurapsyon sa mga proyekto sa gobiyerno kinahanglan gyud nga maproteksyonan ang interes sa katawhan ug masiguradong ang kwartang gitagana magamit gyud sa tarong ug dili mapadulong sa bulsa sa pipila.

Apan mabuhat lang gyud kini kun adunay pormahon nga komisyon sama og papel ug tahas sa Independent Commission for Infrastructure nga hapit ng mapupos ang mandato pagsubay sa tanang proyekto sa gobiyerno sulod sa nakalabay nga napulo ka tuig.

Kinahanglang magtukod og Independent People’s Commission nga pinaagi sa balaud mahatagan sila og gah ig ngipon aron mas epektibo sa ilang imbestigasyon batok sa kurapsyo.

Ang ICI bisan sa kamubo palang sa panahon gikan sa pag-umol niini ni Presidente Ferdinand Marcos Jr. maoy responsable aning mga gipangkasohan na karong mga engineers sa DPWH ug kontraktor nga si Sara Discaya. Duna pa silay ubang mga nadiskubrehang pagpangurakot posibleng dunay mga umaabot pang pangkasohan apil ang mga magbabalaud nga nangwarta sa mga flood control projects sa ilang mga distrito.

Kinahanglan nga kutob ra sila paghimo og imbestigasyon ug ang Department of Justice ug sa Ombudsman maoy mopasaka sa kaso ug mohukom og silot niadtong mga sad-an.

Kay kun basihan ang mga naukay nga mga ebidensiya nga gipangpublikar na diha sa media, susama og usa ka dakong sindikato sa mga kawatan nga ang mga aktor mao mismo ang mga kawani, opisyales ug mga magbabalaod sa gobiyerno kauban ang ilang mga kakunsabo.

Kung dili kini tinud-on karon, dili imposibleng buhaton na sab kini ani gihapong mga tawhana sa mosunod unya nga adminsitrasyon. Pagkaluoy sa Pilipinas.