Human sa pagpulaw

Puno sa kagahob ang palibot. Ako uban nila Padre Jay ug Alexus mga OAR ng mga kaparian gisaulog namo ang Santos nga Misa uban sa katawhan ug mga parokyano ni San Vicente Ferrer dinhi sa Buanoy Balamban.

Sadya kaayo ang maong kasaulogan. Nindot ug tulukibon kaayo ang wali ug pamalandong ni Padre Jay.

Human sa Misa duna kami’y yano nga panihapon sa kumbento.

Salamat kaayo ni Zurig Family nga nagmanggihatagon kaayo sa yellow fin. Lamian kaayo ang inun-onan ingon man ang tinola niini. Layo pa sa high blood.

Ang labing mahinungdanon dunay pakigkukabildo nga nahitabo.

Human sa maong yanong panagtigom nanguli sila sa Arpili samtang ako nisulod sa akong lawak aron mopahuway na.

Kahilom ang nihulip sa kagahob. Wala na ang mga pakpak ug katawa. Apan dako Nakong pasalamat ning maong kahilom kay pinaagi niini akong:

1. Nakita ang akong kaugalingon. Ang akong kaugalingon sa iyang pagkamao gayud. Dili tanan mahayag, anaa usab ang kadulom.

2. Nadungog ko ang tingog sa Dios uban ang iyang paghukngay ngari kanako.

Ang akong pagdumili nga mopatalinghog ang nakapaaghat nga kinahanglang masamdan ang akong kasingkasing aron ang Dios makasulod ug makapuyo niini.

Sa ato pa, kinahanglang higalaon ko ang akong samaran nga kaugalingon aron matagamtaman ko ang kaayohan gikan sa bisan unsang emosyonal nga basura nga niabat kanako sulod sa daghang mga katuigan sa akong panaw nga tawhanon.

3. Labaw sa tanan ang maong kahilom nagdapit kanako sa pagpangindahay sa Ginoo lamang ning maong kasaulogan sa Pasko sa Pagkatawo sa atong Ginoo.

Silent Night all is calm, all is bright matud pa sa awit. Ug ang naghatag og kahayag taliwala ning mangitngit nga kinabuhi mao man si Kristo Jesus atong Ginoo sa hingpit.