Pagpamalandong matag Domingo

Dili lalim ang nahiagoman sa Santos nga Banay sa dihang si Herod the Great ang nisugo nga kinahanglang pamatyon ang mga santos inocentes tungod sa batang Jesus nga gipangita niya aron patyon. Kini tungod kay ang maong bata giisip man niyang hulga sa seguridad sa iyang gingharian. Dinhi siya sayop sanglit ang maong bata ingon nga hari dili man hari alang ning kalibutana.

Apan bisan pa man niini nabutang sa kakuyaw ang kinabuhi sa bata. Ning maong kakuyaw si San Jose ingon nga tawong matarong ang nidala sa iyang pamilya ngadto sa Ehipto.

Nikagiw sila aron makalingkawas sa kapintas ni Herodes.  Tingali ang maong panaw dili lalim ug puno sa kakuyaw. Moadto sila sa dapit diin lahi alang kanila. Apan kinahanglang mopanaw sila paingon ngadto aron matuman ang giingon sa kasulatan nga pagatawgon sa Dios ang iyang anak didto sa Ehipto.

Ang aktwal nga panghitabo karong mga panahona didto sa Palestina nagsubli sa gidangatan sa atong Ginoo.

Ang mga gubat ug kapintas nga mga nahitabo ang hinungdan kun nganong daghang mga inosente ang nawad-an og panimalay, kabanay ug bisan gani kabataan.

Ang padayong gubat nga nahitabo didto naghulagway lamang kun sa unsang paagi nabanhaw si Herodes ning atong kapanahonan karon. Ug dili lang kay kini lang.

Daghan sa mga pamilya karon ang nabutang sa kakuyaw gumikan sa mga pang abuso ug pangdagmal nga hinimo mismo sa gituohan nga molaban ug moamping sa pamilya ug mga kabataan.

Ning atong pagsaulog sa Pangilin sa Balaang Banay, unta atong atimanon ug palamboon ang atong tagsa tagsa ka mga banay sibo sa kinaiya ug pagtulon-an nga gipakita sa Balaang Banay.