Ang Panulondon ni Rizal

Sa umaabot nga Disyembre 30, atong gisaulog ang Rizal Day, usa ka adlaw sa paghinumdom sa patriotismo ug heroism ni Dr. Jose Rizal.

Dili siya bayani tungod sa armas o pagpatay, kon dili tungod sa iyang hunahuna, panulat, ug lawom nga gugma sa iyang yutang natawhan.

 Pinaagi sa iyang mga sinulat ug lihok, iyang gipukaw ang konsensya sa mga Pilipino ug gipakita nga ang tinuod nga kusog sa nasod nagagikan sa kahibalo ug kaisog sa pagbarog sa kamatuoran.

Sa karon nga panahon, nagkahanaw na ang patriotismo sa daghang Pilipino.

Ang korapsyon nagkatag sa laing-laing institusyon sa gobiyerno, samtang daghan ang nag-antos sa kakabos, kalisod, kagutom, ug kawalay paglaum. Mora'g gikapoy na ang katawhan sa pagsalig.

Apan ang panulondon ni Rizal nagpahinumdom kanato nga ang kausaban magsugod sa ordinaryong tawo nga adunay baroganan ug gugma sa nasod.

Wala gitudlo ni Rizal ang paggamit sa kapintasan. Ang iyang tuyo mao ang reporma pinaagi sa husto nga panghunahuna, edukasyon, ug klaro nga pagpahayag sa kamatuoran.

Kitang mga Pilipino, responsibilidad nato nga panalipdan ang atong kagawasan ug mo barog batok sa korapsyon bisan unsa pa ka lisod. Ang paghilom usa ka dakong sayop kon ang atong nasod nag-antos.

Tinuod nga giingon nga ang buhat mas kusog pa kay sa pulong.

Apan karon, ang mga pulong ug ang Rizal Day nahimo na lang og ordinaryong holiday, walay lawom nga hinongdan.

Bisan pa, ang pulong makahimo gihapon og kausaban kon makapukaw sa kasingkasing.

Panahon na nga unta molihok karon, ug dili ugma. Kay kon maglangan pa, basin ulahi na ang tanan.