Sulod sa akong lawak

Daghang mga tawo usa niana ka kaadlawon sanglit padayon man ang atong gihimong mga Misa de Gallo.

Daghang mga tawo ning panahona. Daghan ang naningkamot nga mahuman nga walay palta ang mga kaadlawon nga mga misa aron mahatagan kuno og katumanan ang mga pangandoy ug giampo nila karong mga panahona.

Apan alang Kanako dili lang ni mahitungod sa mga pangayo ug mga gihangyo.

Hinunoa mahitungod kini sa pagtukaw diha sa pag-ampo. Anaa sa gihapon ang mga pahiyom labina gyud sa mga batan-on nga dasig kaayo sa ilang mga mugna ning mga panahona.

Ingon ini pud ang akong gibati nadtong batan-on pa ako sa mga nangmaas na nga mga katuigan.

Nisulod ko sa lawak human sa misa nga gisaulog. Ang kagahob nahulipan og kahilom.

Gipawong nako ang sugang dagitab ug bugtong ang suga lamang sa akong study table ang akong gipasiga diin bugtong nidan-ag niini ang krusipiho nga nagtapot.

Bugtong ang krusipiho ingon man ang gilansang niini ang rason kun nganong kita magsaulog ning tinuig nga paghandom sa iyang pagkatawo.

Ang Pasko bisan dunay maya nga aspeto apan konektado gihapon kini sa krus ni Kristo ang kinatas-ang akto sa iyang dakong gugma alang kanato.

Lisud ang panahon karon. Daghang mga butang nga lisud tugkaron labina nga daghang kalisdanan ang nasinati.

Daghang ang buot mamahimong tarong apan daghan ang nahitumpawak sa kawalay kapaingnan ug kangitngitan. Daghan ang buot mamahimong hayahay.